Komisioni për Ekonominë dhe Financat miratoi sot Aktin Normativ të qeverisë për ndryshimin e buxhetit të vitit 2020.
Ministrja e Financave dhe Ekonomisë, Anila Denaj tha se përmes këtij Akti Normativ alokojmë 7.03 miliardë lekë fond shtesë për Paketën e dytë financiare për qytetarët dhe bizneset në kuadër të masave që po ndërmerren për të përballuar pasojat e pandemisë së COVID-19.
Po ashtu, tha Denaj, përmes këtij Akti Normativ reduktohen shpenzimet e buxhetit, të personelit dhe ato korrente, bazuar në analizën e ecurisë së tremujorit të parë të institucioneve buxhetore.
“Përmes Aktit Normativ kryhen reduktimet në shpenzimet për investime publike, duke ulur pagesat e kontratave koncesionare/PPP dhe duke u zhvendosur përkohësisht nga projektet e mëdha infrastrukturore”, shtoi ministrja Denaj.
Akti normativ përcakton dhe synon të akordojë një fond prej 7 miliardë lekësh në zërin “Kontingjenca për paketën sociale anti-COVID”, e cila do të përdoret me vendim të Këshillit të Ministrave.
Ky fond i dedikohet financimit të masave të reja me karakter social që do të ndërmarrë qeveria, në funksion të lehtësimit e të mbështetjes së punëmarrësve dhe/ose shtresave të tjera të prekura nga pezullimi i proceseve të punës në shkallë vendi, si për biznesin e madh ashtu edhe për pjesën e mbetur të biznesit të vogël.
Po ashtu, reflektohet një total pakësimesh prej 7 miliardë lekësh, me qëllim financimin e paketës së re anti-COVID19, pra pa kosto shtesë në buxhet, konkretisht përmes kursimeve në shpenzimet e personelit me rreth 829 milionë lekë, kursimeve në shpenzime operative me rreth 1.28 miliardë lekë, ku ndër kryesoret janë 582 milionë lekë kursime të evidentuara nga ngadalësimi i aktivitetit të institucioneve buxhetore për periudhën mars-maj, 700 milionë lekë nga kontrata vjetore e Rapiscan.
Në investimet me financim të brendshëm janë pakësuar rreth 4.25 miliardë lekë, konkretisht, rreth 1 miliard lekë nga projektet e shkollave, rreth 1 miliard lekë nga projekti i Rrugës së Arbrit, rreth 1 miliard lekë nga Ministria e Mbrojtjes, rreth 800 milionë lekë nga kontratat e inceneratorëve Fier dhe Elbasan, si dhe janë pakësuar investimet me financim të huaj rreth 634 milionë lekë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
