Banka e Shqipërisë ka reaguar zyrtarisht ditën e sotme pas incidenteve të fundit të regjistruara ndaj disa degëve bankare dhe bankomateve (ATM) në vend.
Përmes një deklarate për shtyp, institucioni qendror financiar ka siguruar publikun se, pavarësisht dëmeve materiale dhe kufizimeve të përkohshme në disa pika, stabiliteti financiar dhe kursimet e qytetarëve nuk janë në asnjë lloj rreziku.
Banka e Shqipërisë bëri me dije se po ndjek me vëmendje dhe shqetësim situatën, duke vendosur si prioritet absolut jetën dhe integritetin e individëve.
"Në këto rrethana, siguria e qytetarëve, klientëve dhe punonjësve të institucioneve financiare mbetet përparësi," nënvizon Banka e Shqipërisë në njoftimin e saj.
Për të shmangur panikun dhe për të garantuar mbarëvajtjen e aktivitetit ekonomik, autoriteti monetar siguron se i gjithë rrjeti i pagesave është plotësisht funksional. Roli i sistemit bankar mbetet i palëkundur në mbështetje të bizneseve dhe nevojave të përditshme të familjeve shqiptare.
Banka e Shqipërisë thekson se depozitat dhe kursimet e qytetarëve në sistemin bankar janë të sigurta. Dëmtimet e një pjese të infrastrukturës fizike në disa degë të bankave nuk cenojnë sigurinë e depozitave të klientëve dhe as qëndrueshmërinë financiare të bankave. Qytetarët duhet të jenë të qetë se kursimet e tyre janë të mbrojtura dhe nuk rrezikohen nga dëmtimet fizike të ambienteve.
Në kuadër të përgjegjësive ligjore, po bashkëpunohet ngushtë me bankat tregtare dhe agjencitë ligjzbatuese për të menaxhuar situatën. Kufizimet e vërejtura në disa degë specifike janë kryer vetëm për arsye sigurie të personelit dhe klientëve.
Banka e Shqipërisë fton qytetarët dhe bizneset të ndjekin njoftimet zyrtare të bankave përkatëse dhe të përdorin sa më shumë kanalet alternative të shërbimit bankar.
Duke e cilësuar sistemin bankar si një "shtyllë me rëndësi thelbësore për ekonominë", autoritetet rikujtojnë se pas çdo transaksioni apo dege qëndrojnë familje dhe qytetarë që administrojnë të ardhurat e tyre, ndaj ruajtja e këtij ekosistemi është jetike për vendin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
