Një 41-vjeçar i identifikuar si Elton Marko nga Himara është arrestuar këtë të martë nga policia e Vlorës pasi akuzohet për falsifikim dokumentesh dhe pastrim parash.
Burimet zyrtare bëjnë me dije se Marko, me detyrë topograf në Bashkinë e Himarës dyshohet se ka falsifikuar formularin e Aktit të Marrjes së Tokës në Pronësi të cilin më pas e ka përdorur për regjistrim e një pasurie në fshatin Dhërmi dhe më pas e ka shituar atë te persona të tjerë.
“Nga specialistët për Hetimin e Krimit Ekonomik dhe Financiar në DVP Vlorë u bë ekzekutimi i vendimit të datës 06.11.2021, të Gjykatës së Shkallës së Parë Vlorë, e cila ka caktuar masën e sigurimit personal “Arrest në burg” për veprat penale “Falsifikimi i dokumenteve” dhe “Pastrimi i produkteve të veprës penale”, për shtetasin E. M., 41 vjeç, banues në Himarë”, shkruan ndër të tjera policia.
Ndërkohë materialet i kaluan Prokurorisë së Vlorës, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
