Nunaj: TVSH-ja s’mund të hiqet, por mund të ulet. Të ketë një rishikim për produktet ushqimore

Ekspertja e ekonomisë Teuta Nunaj tha në “Mcn Economy” se TVSH-ja nuk mund të hiqet, por mund të realizohet një ulje e saj.

Sipas Nunajt duhet të ketë një rishikim të TVSH-së te produktet e ushqimore. Sa i takon minimumit jetik ajo mendon se kjo nismë është një vullnet politik.

“Gjykoj se TVSH s’mund të hiqet, ajo që mund të realizohet është një ulje e saj. Rritja e çmimeve s’është kompensuar asnjëherë te qytetarët. Kemi një rritje shumë të lartë të inflacionit që s’është përkthyer në një rishpërndarje të të ardhurave. Nëse buxheti i shtetit ka një x para plus për shkak të çmimeve të larta, qeveria s’e ka shpërndarë këtë të ardhur, që është marrë në mënyrë të padrejtë. Është e nevojshme të ketë një rishikim të TVSH-së te produktet e ushqimore, duke u mundësuar pensionistëve që ta kenë më të lehtë përballimin e jetës së tyre. Ekonomia, në tre katër vitet fundit ka filluar të zërë një vend në tryezat e diskutimeve, që s’është ende një vend kryesor. Në SHBA një nga debatet që bëhet vazhdimisht është ekonomia e vendit. Të gjitha programet televizive në ‘prime time’ në pjesën më të madhe të tyre ndiqet politika e ditës, dhe jo ekonomia e ditës. Jemi në hapat e parë për ta kthyer ekonominë në një element themeltar të ekzistencës, të funksionimit të një shteti, dhe funksionimit të qeverisë dhe partive politike, programet e tyre, por jemi ende në hapat e para. Në parim jam kundër taksimit zero, dhe jam në mbështetje të formave që nxisin mbështetjen e shtresës së mesme dhe të ulët. Realizimi i minimumit jetik është vullnet politik. S’do ketë asnjë pension, ndihmë ekonomike, apo pagë nën këtë minimum jetik”.