Pas anulimit të ndërtimit të lotit të 7 të rrugës Kardhiq-Delvinë, kompania Gjoka Construction, një prej 6 pjesëmarrësve në garë për tenderin, akuzon ARRSH-në për favorizim në tendera.
ARRSH e ka motivuar skualifikimin e Gjoka Konstruksion sh.a me “paraqitje të të dhënave fiktive në përpjekje për të fituar tenderin për ndërtimin e tunelit të rrugës Kardhiq-Delvinë lot 7”.
Por në një deklaratë të kompanisë thuhet se përveçse tenderi është shtyrë dy herë nga ARRSH, është ulur edhe kategoria e licencës në ndërtim dhe janë ndryshuar kriteret e dëshmisë së përvojës së ngjashme në projektim.
Sipas Gjoka Konstruksion sh.a, tenderi është zhvilluar më 17 qershor 2019 me pjesëmarrjen e 6 operatorëve të ndryshëm.
“5 operatorë rezultonin në formën e një bashkimi shoqërish ndërsa 1 operator rezulton si ofertues i vetëm. Gjatë hapjes së ofertave, oferta jonë ishte në vend të parë me diferencë të dukshme me secilin nga operatorët e tjerë të lexuar nga KVO. Kemi kërkuar përgjatë 2 ditësh pajisjen me procesverbalin e hapjes së ofertave, por në shkelje flagrante të ligjit nuk na u mundësua asnjëherë nga ARrSh”, thuhet në njoftim.
Pavarësisht se ka paraqitur ofertën më të ulët, Gjoka Construction është skualifikuar nga gara, të cilën e ka fituar “Ircop” S.p.a, me një diferencë prej 509 729 253.75 lekë më shumë.
Sipas kompanisë, shtyrja dy herë e tenderit është bërë me qëllim që kompanisë që më pas rezultoi fituese, pra “Ircop” S.p.a., t’i jepej koha e mjaftueshme për të plotesuar kriteret.
“Pas verifikimit të statutit të kësaj shoqerie kemi konstatuar se nuk është e licencuar në projektim ndaj kemi patur pikëpyetjet tona se si do ta siguronte projektimin e këtij objekti, dhe si e kishte garantuar ARrSh se plotësonte kriteret e kualifikimit për projektimin, kur nga sistemi rezultonte të ishte operator i vetëm në këtë garë”, thuhet në deklaratën e kompanisë “Gjoka Construction”.
Tre ditë më parë u njoftua anulimi i tenderit për këtë aksi. Vendimi për anulimin e tenderit të rrugës Kardhiq-Delvinë është marrë nga ministrja e Infrastrukturës, Belinda Balluku, e cila ka kërkuar që fondet të rialokohen në disa projekte të tjera.
Fondi limit i vënë në dispozicion për këtë segment rrugor që është në ndërtim e sipër është 2.3 mld. Me një gjatësi prej 34 kilometrash, kostoja e rrugës Kardhiq – Delvinë llogaritet të shkojë 64 milionë euro. Ajo është cilësuar si një nga akset më të rëndësishme për turizmin në vend, pasi shkurton me 3 orë kohën e udhëtimit nga Tirana në Sarandë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
