Rritja e çmimeve/ Muço: Tregtarët e shumicës abuzojnë më shumë, shteti ka instrumentet për të bërë transparencë

Prej disa muajsh tregu në vend është përfshirë nga çmimet e larta, si në supermarkete, ato bujqësore dhe të karburanteve.

Për këtë çështje, eksperti i Ekonomisë Klodian Muço, në një lidhje për MCN, u shpreh se, ata që po përfitojnë dhe po abuzojnë në kurriz të qytetarëve janë tregtarët e shumicës. 

Ai tha se shteti i ka të gjitha instrumentet për të bërë transparencë në lidhje me çmimet.

Kjo rritje çmimesh favorizon tregtarët e shumicës, të cilët abuzojnë më shumë me to. Shteti i ka të gjitha instrumentet e nevojshme për të bërë transparencë. Nga kjo situatë përfitojnë tregtarët e shumicës. Ndonëse ka shumë vende ku mund të blesh produkte të ndryshme, ata që abuzojnë janë pikërisht tregtarët e shumicës.

 

 E njëjta gjë ndodh edhe te produktet ushqimore, ku tregtarët e shumicës mbeten përfituesit kryesorë. Merret rasti i fruta-perimeve, në zonën e Lushnjes ato grumbullohen ose shiten për 50 lekë, ndërsa në Tiranë çmimi shkon në 200 lekë më shumë për kilogramë. Nuk fiton prodhuesi, por pika e magazinimit ose tregtarët e shumicës që i sjellin produktet në Tiranë.

 

Muço solli në vëmendje modelin e ndjekur nga Greqia fqinje, si një shembull pozitiv se si shteti mund të bëhet faktor rregullator pa cenuar parimet e tregut të lirë.

Problemi i rritjes së çmimeve nuk është një fenomen vetëm shqiptar, por edhe evropian. Për shembull, në Greqi, sapo shteti konstatoi rritjen e çmimeve, vendosi që për 1670 produkte të kishte një ulje nga 5 deri në 7%. Atje u pa që shteti reagoi dhe u mundua të bindte tregtarët që të ulin sado pak çmimet. Në Shqipëri është marrë një nismë përmes së cilës mendohet të vendoset transparenca te çmimi.