Partia Demokratike ka reaguar sot përmes deputetes Jorida Tabaku, përkitazi me raportin e MONEYVAL, e cila rendit Shqipërinë në listën gri dhe konsiderohet nga Indeksi Bazelit si një nga vendet kryesore ku mund të pastrohen paratë”.
Tabaku thotë se “një nga 15 kushtet e BE-së për të zhvilluar konferencën e parë ndërqeveritare dhe çelur zyrtarisht procesin përfundimtar të integrimit është lufta kundër pastrimit të parave”.
“Në Evropë renditemi të fundit, ndërkohë që jemi fqinj me Taxhikistanin. Sivjet indeksi na rendit të 72 duke pasur rënie në raport me 2020: pastrimi parave është pari në renditjen negative, pastaj korrupsioni dhe ryshfeti janë të dytët në renditjen problematike”, tha ajo.
Tabaku tha se ky është një binom i pandashëm që njollos çdo përpjekje të shqiptarëve për të integruar vendin në BE.
“Ndërtimi sidomos në Tiranë, investimet nga sipërmarrje me pikëpyetje në turizëm me bekimin e qeverisë, lojërat e fatit janë sektorët që kanë njollosur Shqipërinë në këtë renditje, e po pengojnë rrugëtimin tonë në BE. Pavarësisht retorikës së ditës, propagandës së rremë e çdo shfaqje që ngre tendat sa herë del Rama, faktet bërtasin. Kjo mazhorancë nuk ka vullnetin dhe as dëshirën për të përmbushur kushtet dhe për të integruar vendin”, tha ajo.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
