Arben Malaj ka reaguar sërish pas kërkesës së grupit parlamentar socialist për shkarkimin e tij nga bordi i Këshillit Mbikëqyrës të Bankës së Shqipërisë.
Në një postim në rrjetet sociale, drejtuar atyre që ai i cilëson iniciues realë të kërkesës për shkarkim, Malaj shprehet se kjo është një hakmarrje jo vetëm politike.
Duke iu referuar argumentit në kërkesë, sipas të cilës deklaratat e Malajt kanë shkelur etikën e BSH, ai thotë se reputacioni i saj është tronditur shpesh nga keqqeverisja dhe vjedhjet e përsëritura brenda dhe jashtë saj.
“Të dashur inicues realë të kërkesës për shkarkimin tim, ndjesë nënshkruesve me ose pa vetëdije profesionale, karriket i keni marrë sa herë që ju janë dashur për t’i keqpërdorur, ndërsa integritetin njerëzor dhe kredibilitietin profesional as e blini dhe as e cenoni dot, sot dhe deri në fund të angazhimeve të mia publike, profesionale apo politike.
Kjo u ka bërë të hidhni poshtë fasadat dhe të tregoni thelbin e kësaj hakmarrjeje jo vetëm politike. Ju ribëj publikisht të qartë se aspak nuk cenohet reputacioni Bankës së Shqipërisë, i cili deri në të shkuarën shumë të afërt është tronditur shpesh nga dështimi i keqqeverisjes së saj deri në vjedhjet e përsëritura nga brenda dhe jashtë saj.
Këtë shqetësim e kam ngritur që në ditën e parë të mandatit plotësues të KMBSH- në plotësim të mandatit që më besoi Kuvendi i vendit tim (do t’i gjeni të dokumentuara në proces-verbalet përkatëse).
Aktualisht edhe Banka e Vatikanit, më e errëta dhe sekretja në botë, po bëhet më transparente, dhe po dënohen abuzuesit e saj.
Falënderoj Zotin që ju iniciuesve realë që hidhni gurin dhe fshihni dorën, nuk ju ka dhënë fuqi mbihyjnore të kërkoni edhe shkarkimin e Papa Françeskut, që po inicion këtë proces historik për të hedhur dritë në skutat më të errëta të bankës më sekrete të botës".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
