Nuk ka më asnjë mënyrë për të shmangur shlyerjen e faturës që arbitrazhi i ka ngarkuar Shqipërisë në lidhje me çështjen “Beketi”. Në studion e lajmeve të MCN TV, gazetari i ekonomisë, Klodian Tomorri, tha se ajo që pala shqiptare ka nisur është thjesht një procedurë sqarimi, që nuk ndikon në uljen e detyrimit që qeveria shqiptare duhet të shlyejë. Tomorri shtoi se deklaratat e Ramës gjatë fushatës se ai e kishte strategjjinë për të shmangur pagesën e faturës së majme kanë qenë thjesht për përfitim politik në atë moment.
Vendimi i arbitrazhit për Beketin është i formës së prerë. Gjyqi ka kaluar dy faza, kjo është e treta. Faza e parë ishte përplasja, Shqipëria u dënua me gjobë. Qeveria shqiptare ankimoi dhe kërkoi anulimin. Gjykata në prill e rrëzoi kërkesën e Shqipërisë duke i dhënë formë të prerë. Tani Avokatura e Shtetit ka bërë një procedurë që në termin e gjykatës njihet me emrin sqarim. Pra palët kanë të drejtë të kërkojnë korrigjim gabimesh të vogla. Pala shqiptare mund të ketë kërkuar një korrigjim, të themi për normën e interesit, por kjo procedurë nuk ndryshon në thelb vendimin. Nuk çon në përmbysje të vendimit apo ulje të dëmshpërblimit. Pse pala shqiptare e ka kërkuar? Njëra arsye është, e mbani mend që vendimi doli në kulmin e fushatës elektorale? Rama tha se e kam një strategji, por këto ishin manovra për ta shtyrë në kohë sa të kalonin zgjedhjet. Ai vendim nuk kthehet më dhe Shqipëria është e detyruar të paguajë. Qeverisë shqiptare nuk i mbetet vecse të paguajë nga buxheti. Nëse del dhe nuk njeh autoritetin e gjykatës kjo do të kishte pasoja të rënda. Nuk besoj se Shqipëria ka fuqinë për t’u hyrë këtyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
