Denoncimi për tenderin e AKSHI-t, Tomorri: I dyshimtë për shkak të vlerës së lartë dhe mënyrës si u anulua fillimisht

Gazetari Klodian Tomorri deklaroi në studion e lajmeve në MCN Tv se tenderi i AKSHI-t për të cilën u bë dhe një denoncim ditën e sotme nga Partia Demokratike që ka të bëjë me shërbimin e intranetit dhe internetit për disa institucione publike është i dyshimtë për shkak të vlerës së lartë dhe mënyrës si u anulua tenderi i parë.

Duke vijuar më tej me shpjegimin e tij, Tomorri tha se brenda një periudhe 3 mujore u anulua tenderi i parë me vlerë 5.5 milionë euro dhe u hap sërish për shifrën 17.2 milionë euro.

Ajo që ka ndodhur është që fillimisht tenderi për shërbimin e intranetit dhe internetit  u shpall për herë të parë në fund të dhjetorit të vitit të kaluar me fond limit 5.5 milionë euro dhe parashikonte që kompania që do përzgjidhej fituese do ofronte infrastrukturën e intranetit, pra do të lidhte 3 institucione, Kadastrën, Tatimet dhe Institucionin e Sigurimeve Shoqërore me drejtoritë e tyre rajonale do t’i lidhte me shërbimin e intranetit.

Intraneti është rrjeti i brendshëm që përdor qeveria për komunikim dhe në mënyrë të beftë pasi u shpall ky tender u anulua për t'u hapur sërish. Në tenderin  e ri veç lidhjeve të intranetit të këtyre 3 institucioneve me drejtoritë e tyre rajonale dhe shërbimin e internetit  AKSHI ka shtuar disa institucione të tjera, shërbimi i internetit të të cilave prokurohet nga AKSHI. Bëhet fjalë për drejtoritë e transportit rrugor në Tiranë dhe rrethe, për një sërë institucionesh publike, rreth 50 të tilla dhe kjo ka çuar në rritjen e fondit në 17.2 milionë euro. Është tender i dyshimtë për shkak të vlerës së lartë dhe për shkak të mënyrës si u anulua tenderi i parë.

Procedurat e prokurimeve kanë një regjistër parashikimesh. Në fillim  të vitit çdo institucion paraqet në qeveri apo Ministrinë e Financave paraqet listën e prokurimeve, listën e  shërbimeve për të cilat ka nevojë. Tek AKSHI ka një fshehtësi të tillë që brenda 3 muajsh e hapin tenderin me 5 milionë, e mbyllin edhe e hapin me 17.2 milionë euro për të njëjtin shërbim.