Një gjykatë tregtare në Madrid ka urdhëruar “Meta Platforms” të paguajë 479 milionë euro (rreth 550 milionë dollarë) si kompensim ndaj më shumë se 80 mediave spanjolle, pas zbulimit se kompania ka shkelur rregullat e konkurrencës dhe privatësisë së të dhënave.
Padia, e ngritur nga Shoqata e Mediave të Informacionit (AMI), pretendon se Meta përpunoi në mënyrë të paligjshme të dhëna të përdoruesve të Facebook dhe Instagram për reklama të synuara midis 2018 dhe 2023, duke krijuar një avantazh të padrejtë ndaj mediave tradicionale.
Gjykata argumentoi se mediat spanjolle nuk kishin mundësi të konkurronin me volumin e të dhënave që Meta përpunonte pa pëlqimin e duhur të përdoruesve. Gjatë periudhës së hetuar, Meta ka gjeneruar mbi 5.3 miliardë euro të ardhura nga reklamat në Spanjë.
Kompania e ka kundërshtuar vendimin dhe ka paralajmëruar apel, duke e quajtur çështjen “të pabazuar” dhe duke thënë se industria e reklamave funksionon ndryshe nga mënyra si e përshkruan padia.
Rasti shihet si një precedent i rëndësishëm në Bashkimin Evropian, i cili prej vitesh është në përplasje me gjigantët e teknologjisë mbi rregullat e konkurrencës dhe privatësisë. Në vitet e fundit, Meta është gjobitur disa herë nga autoritetet e BE-së, përfshirë një gjobë prej 800 milionë eurosh në 2024 për praktikat e “Facebook Marketplace”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
