Shqipëria dhe Kosova kanë forcuar bashkëpunimin në sektorin e bujqësisë dhe zhvillimit rural përmes finalizimit të dy marrëveshjeve të reja në Tiranë.
Ministri i Bujqësisë dhe Zhvillimit Rural, Andis Salla, zhvilloi një konferencë të përbashkët për shtyp me homologun e tij nga Kosova, Armend Muja, ku u diskutua mbi thellimin e bashkëpunimit mes dy vendeve në këtë sektor.
Fokus i bisedimeve ishte rritja e konkurrueshmërisë së produkteve agroushqimore, mbështetja e fermerëve dhe përafrimi me standardet e Bashkimit Evropian.
Salla theksoi se bashkëpunimi mes Shqipërisë dhe Kosovës do të shërbejë për shkëmbimin e përvojave dhe zhvillimin e nismave të përbashkëta në mbështetje të fermerëve.
“Bashkëpunimi ndërmjet institucioneve tona merr një rëndësi të veçantë, duke krijuar mundësinë e shkëmbimit të përvojave midis dy vendeve dhe forcimin e kapaciteteve për zhvillimin e iniciativave të përbashkëta në interes të fermerëve.
Marrëveshja për marketimin dhe promovimin e produkteve agroushqimore synon rritjen e konkurrueshmërisë së produkteve tona, forcimin e pranisë së tyre në tregjet rajonale dhe ndërkombëtare”, tha Salla.
Nga ana tjetër, ministri i Kosovës, Armend Muja, deklaroi se Kosova ka vënë në dispozicion të Shqipërisë njohuritë dhe përvojën e saj në prodhimin e verërave, si dhe në fusha të tjera të bujqësisë.
Ai shtoi se Kosova është e interesuar të përfitojë nga ekspertiza e instituteve shqiptare në fushën e farave dhe prodhimit bimor, me synim rritjen e rendimentit dhe përballimin e sfidave të sektorit.
Muja gjithashtu bëri të ditur se po rishikohen barrierat administrative që pengojnë lëvizjen e lirë të mallrave mes dy vendeve, duke synuar fillimisht digjitalizimin e kontrolleve dhe më pas lehtësimin e plotë të procedurave, në frymën e integrimit ekonomik rajonal.
Ministri Salla u shpreh se këto marrëveshje pritet të sjellin rezultate konkrete dhe afatgjata për sektorin agroushqimor në Shqipëri dhe Kosovë, duke forcuar bashkëpunimin mes dy vendeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
