Ministri i Infrastrukturës dhe Energjisë Damian Gjiknuri mori pjesë në një forum të organizuar në Senatin e Shteteve të Bashkuara të Amerikës me temë diskutimi çështjet e sigurisë dhe përspektivën integruese të vendeve të Evropës Juglindore.
Të pranishëm në forum ishin senator, kongresmenë dhe përfaqësues të vet vendeve të Evropës Juglindore të cilët shkëmbyen pikëpamjet për sfidat me të cilat përballet ky rajon.
“Kryefjala ku përputhen të gjitha qëndrimet është që nëse duam të shkojmë tek rrënja e problemit dhe duam të kemi një situatë me përspektivë stabiliteti në rajonin e Ballkanit, kjo ka të bëjë mbi të gjitha me zhvillimin ekonomik dhe integrimin e këtij rajoni në Bashkimin Evropian”, u shpreh ministri Gjiknuri.
Thellimi i bashkëpunimit me Shtetet e Bashkuara të Amerikës në kuadër të përpjekjeve për rritjen e sigurisë energjetike në Evropë, Korridori Jugor i Gazit dhe ecuria e ndërtimit të gazsjellësit TransAdriaticPipeline (TAP) ishin në fokusin e bashkëbiseduesve. Gjiknuri u ndal edhe tek projekti JonianAdriaticPipeline (IAP) duke falënderuar Shtetet e Bashkuara të Amerikës për mbështetjen që po i japin këtij gazsjellësi të ri që prek jo vetëm Shqipërinë por Malin e Zi, Bosnjen dhe Kroacinë.
“Në një kohë kur projekti TAP tashmë është në fazën intensive të realizimit, po punojmë ngushtësisht me vendet fqinje për të bërë realitet edhe degëzimin me IAP. Gjithashtu, në kuadër të diversifikimit të burimeve të energjisë, kemi përfunduar tashmë masterplanin për gazifikimin e vendit”, theksoi Gjiknuri.
Në këndvështrimin e tij, zhvillimi ekonomik, interkonektiviteti dhe procesi i Berlinit është një instrument për angazhimin e të gjitha vendeve të rajonit drejt ndërlidhjes më të madhe ekonomike, pra në infrastrukturë, në energji e në tregje, që ky rajon të trajtohet si i tërë, si pjesë e ardhshme e Bashkimit Evropian.
“Sot patëm lajmin që në strategjinë e Bashkimit Evropian del e qartë që vendet e rajonit duhet të integrohen, pavarësisht se mund të ketë pikëpamje të ndryshme për shpejtësinë me të cilin ecin këto vende. Ajo çka është më e rëndësishme është se të gjitha vendet po bëjnë përpjekje, janë duke u angazhuar. Ka dhe vështirësi dhe Bashkimi Evropian këtu është për të ndihmuar përmes strategjisë së qartë dhe mbështetjes financiare për të tejkaluar ato defiçenca të trashëguara në infrastrukturë që kanë vendet e rajonit”, nënvizoi Gjiknuri.
Në kuadër të vizitës që po zhvillon në Uashington ishin të pranishëm edhe deputetë të Kuvendit të Shqipërisë Elona Gjebrea, Fatmir Mediu dhe Aldo Bumçi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
