Gjallërohet huaja për ekonominë në gusht, bankat i rikthehen valutës

Kredia për ekonominë ka vijuar të shfaqë shenja gjallërimi për të dytin muaj radhazi në gusht, sipas statistikave të publikuara sot nga Banka e Shqipërisë, megjithëse stoku mbetet në nivelin e fillimit të vitit për shkak të rënies së huadhënies në muajt e parë.

Stoku i huasë për ekonominë arriti në 550 miliardë lekë, sipas shifrave zyrtare, duke u rritur me 4.3 miliardë lekë, ose 0.3%, në krahasim me muajin e mëparshëm. Ky zgjerim ka ardhur në pjesën më të madhe nga kredia për bizneset në valutë (+3.2 miliardë lekë).

Vetëm pak muaj më parë, guvernatori i Bankës së Shqipërisë paralajmëroi një plan të përbashkët masash me Ministrinë e Financave dhe Autoritetin e Mbikëqyrjes Financiare për të ulur nivelin e euroizimit në ekonomi, që paraqitet tepër i lartë. Por, teksa huaja në valutë kishte vite që ulej, gushti ka sjellë një rritje të papritur të kredisë në monedhë të huaj. Pesha e huasë në valutë u rrit në 51.1%, nga 50.8% që ishte në muajin e mëparshëm.

Megjithatë, duke lënë mënjanë gushtin, kredia në monedhë të huaj është tkurrur ndjeshëm, teksa pak vjet më parë ajo arrinte në rreth 70%.

Një tjetër segment që ka shënuar rritje është ai i huasë për individë, që është zgjeruar me gati 2 miliardë lekë, apo rreth 1.1%, ku efekti më të madh e ka dhënë monedha vendase. Individët po rezultojnë kredimarrës të mirë, teksa niveli i kredive me probleme të tyre ka zbritur poshtë 10% nga rreth 20% që është për bizneset. Si rrjedhojë bankat e kanë përqendruar vëmendjen tek individët, që në pjesën më të madhe marrin hua për blerje apartamenti.

Me bazë vjetore (gusht 2017/gusht 2016), zgjerimi i huasë për ekonominë është negativ, (-0.15%), që ka ardhur tërësisht si rrjedhojë e reduktimi të huasë në valutë. Këtu ka dhënë ndikim edhe fshirja e kredisë me probleme, ku valuta zë peshën më të madhe si dhe efekti i kursit të këmbimit.