Shqipëria dhe Ukraina kanë nënshkruar një marrëveshje dypalëshe për transportin ndërkombëtar rrugor të udhëtarëve dhe mallrave, me synimin për të lehtësuar dhe përshpejtuar lëvizjen e pasagjerëve dhe qarkullimin e mallrave mes dy vendeve.
Marrëveshja u nënshkrua nga ministri i Infrastrukturës dhe Energjisë, Enea Karakaçi, dhe zëvendësministri i Komuniteteve, Territoreve dhe Zhvillimit të Infrastrukturës së Ukrainës, Serhiy Derkach.
Ky dokument krijon një kuadër të ri bashkëpunimi në fushën e transportit rrugor dhe pritet të kontribuojë në rritjen e shkëmbimeve ekonomike, tregtare dhe logjistike ndërmjet Shqipërisë dhe Ukrainës.
Sipas palëve, harmonizimi i marrëveshjes me zhvillimet më të fundit në kuadër të marrëveshjes së transportit rrugor ndërmjet Bashkimit Evropian dhe Ukrainës do të ndihmojë në përmirësimin e mëtejshëm të infrastrukturës logjistike, efikasitetit të transportit dhe lidhjeve tregtare ndërkombëtare.
Marrëveshja konsiderohet një hap i rëndësishëm drejt forcimit të bashkëpunimit ekonomik dhe integrimit më të madh të rrjeteve të transportit mes dy vendeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
