Banka e Shqipërisë raporton se ekzekutimi i kolateralit nga kreditë e këqija ka bërë që sistemi bankar në Shqipëri të administrojë një portofol të konsiderueshëm me prona, që kap vlerën e 250 milionë dollarëve. Por, rreziku i lidhur me “ekzekutimin e kolateraleve” identifikohet edhe si rreziku më i rëndësishëm aktual edhe nga rezultatet më të fundit të vrojtimit të “Perceptimit të rrezikut sistemik nga industria bankare”. Por, nga pikëpamja e stabilitetit financiar është e rëndësishme të vlerësohet ndikimi që ka mbajtja në bilanc e këtyre kolateraleve, kjo, pasi një rënie e çmimit pronave - gjatë periudhës së mbajtjes në bilanc – zvogëlon jo vetëm vlerën e aktivit në bilanc, por edhe të ardhurat që mund të realizohen nga shitja e kolateraleve.
Njëkohësisht, një shitje në masë e këtyre kolateraleve nga ana e bankave mund të ushtrojë presion për rënien e çmimeve në tregun e pasurive të paluajtshme. Kjo e fundit ndikon jo vetëm mbi të ardhurat e bankës, por edhe mbi vlerën e pasurive të paluajtshme të pranuara si burim dytësor garancie gjatë procesit kredidhënës, me pasoja në cilësinë e portofolit të kredisë dhe kapitalizimin e sektorit.
Në vendin tonë deri 10 vite më parë, vlerat e pronave të marra në pronësi nga bankat ishin të papërfillshme, ndërsa 5 vitet e fundit, kur kreditë e këqija u rritën, portofoli i këtyre pronave u rrit, duke shënuar në fund të vitit 2017 rreth 2.1% të totalit të aktivit të sektorit bankar dhe 21.3% të kapitalit rregullator. Sipas Bankës Qendrore, një skenar për një shitje të menjëhershme të këtyre pronave, do t’i shkaktojë sektorit humbje gjatë dy viteve në vijim, që përllogariten nga 30% deri në 70% të vlerës me të cilën mbahen në bilanc.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
