Rritja intensive e volumit të eksporteve të gështenjës në këto 3 vitet e fundit po rikthehet në një burim kryesor të të ardhurave jo vetem për ekonominë e vendit, por edhe për mijëra familje që banojnë në zonat veriore të vendit, ku rritet e kultivohet kjo bimë e vyer, që po nxit dhe krijimin e një zinxhiri të ri të perspektivës së biznesit të gështenjës.
Burime nga Ministria e Bujqësisë, bëjnë të ditur se, gjatë këtij viti janë eksportuar drejt Italisë rreth 2500 tonë geshtenja. Çmimi i eksportit ka qenë 1.3 euro për kilogram, duke siguruar për kompanitë më shumë se 3.2 milionë euro të ardhura. Për nga vlera, gështenja është një treg i vogël, por rëndësia lidhet me volumin e zinxhirit të përfitimit, shprehen ekspertët.
Të ardhurat e siguruara nga eksporti shpërndahen në mijëra familje të banorëve që vjelin dhe gjithashtu shkojnë për financimin e grumbulluesve ndërmjetës që e transportojnë gështenjën nga malet në qendrat e grumbullimit të eksportuesve.
Ekspertët e bujqësisë shprehen se, mbi 1200 ton gështenja eksportohen këtë sezon, kryesisht vetëm nga qarku i Shkodrës, që konsiderohet dhe si vendi më me prodhimtari i kësaj bime. Ndërsa masivi më i madh i gështenjave në Ballkan, me rreth 2000 ha shtrihet në zonën e Tropojës, përmbi “Bajram Curr”, e deri në bjeshkët e Dragobisë.
Mbi 80% e eksporteve shkojnë drejt Italisë ndërsa pjesa tjeter në Gjermani e Austri.
Për zhvillimin e këtij sektori, ministria e Bujqësisë po sheh mundësinë e zbatimit të projekteve për rritjen e vlerës së tregut dhe zhvillimin e linjave të agropërpunimit të gështenjsës.
Ndërsa përmes skemave subvencionuese dhe kreditimit me interesa të butë, politikat e qeverisë synojnë rikthimin e traditës së prodhimit të bollshëm të gështenjave në vend dhe eksportin masiv të tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
