Rama me fermerët: Brenda vitit do të kemi Bankën shqiptare të Zhvillimit

Kryeministri Edi Rama në takim me fermerët dhe sipërmarrësit ku u fol për buxhetin e vitit 2026, njoftoi se brenda këtij viti do të krijohet Banka shqiptare e Zhvillimit, e cila do të jetë në mbështetje të fermerëve.

Ai deklaroi se në shërbim të fermerëve do të jetë dhe Agrokrediti, një institucion i varur nga Ministria e Financave.

Kreu i qeverisë ftoi bashkitë që të ngrihen në lartësinë e nevojës së fermerëve për financë dhe mbështetje institucionale.

Brenda këtij viti finalizohet Banka jonë e Zhvillimit. Shqipëria do të ketë Bankën e Zhvillimit, që do të jetë një tjetër instrument për të mbështetur instrumentet dhe projektet tuaja. 

 

Ndërkohë që po rivëmë në lëvizje, në favorin tuaj, për të mbështetur projektet dhe sipërmarrjet tuaja, edhe Agrokreditin, që është një institucion i varur nga Ministria e Financave. Linja e re e kreditimit të ndërmarrjeve të vogla dhe të mesme e Bankës së Shqipërisë, e cila shkon deri në 250 milionë euro si fazë e parë dhe mund të shkojë deri në 2 miliardë euro, është aty dhe ju pret ju.

 

 E kam thënë dhe e them, pushteti vendor, bashkitë duhet të ngrihen në lartësinë e kësaj sfide, e nevojës suaj për financë, për mbështetje institucionale dhe me dije, për të mos qenë vetëm në këtë përpjekje. Bashkitë e kanë mundësinë të bëhen. Nuk ka nevojë që të prisni të vijë dikush për të ndërtuar një infrastrukturë grumbullimi e përpunimi, që patjetër do t’i shtonte vlerë asaj që ju prodhoni dhe mblidhni në fermë. Ju mund ta bëni vetë duke u bashkuar me njëri-tjetrin dhe me pushtetin vendor. 

 

I takon bashkisë të vijë tek ju. Këtu nuk bëhet fjalë për t’iu lëshuar bankave komerciale për të marrë kredi, por për t’i vënë në punë ato instrumente që i kemi krijuar dhe tani na duhet të ndërtojmë projektet dhe partneritetet e duhura dhe të disbursojmë që të ketë më shumë para në duart tuaja për të investuar më shumë.

 

Kërkesa për cilësi dhe siguri shoqërohet me instrumente kontrolli të rrepta që të nxjerrin edhe nga tregu. Bashkia duhet të jetë te toka me ata që kanë nevojë për mbështetje. Kemi ikur nga faza e mbijetesës.