Të paktën 49 persona kanë humbur jetën nga etja në një zonë të largët të shkretëtirës së Saharasë në veri të Nigerit, pasi kamioni me të cilin udhëtonin pësoi defekt.
Grupi po kthehej nga Mali, ku kishte marrë pjesë në një festival mysliman, kur mbeti pa ujë.
Ata mbetën të bllokuar më shumë se 80 kilometra në perëndim të Assamakës, një pikë e rëndësishme kalimi kufitar mes Nigerit dhe Algjerisë.
“Udhëtarët u gjendën të bllokuar në zemër të një mjedisi armiqësor, ku temperaturat ekstreme dhe mungesa e pikave të furnizimit e bëjnë mbijetesën jashtëzakonisht të vështirë”, thuhet në një deklaratë të guvernatorit të rajonit të Agadezit.
Vetëm dy persona arritën të mbijetonin.
Ata ecën nëpër shkretëtirë deri në Assamaka, ku njoftuan autoritetet për tragjedinë.
Sipas deklaratës, kamioni ishte nisur nga qyteti malian Telhandek, por kishte devijuar nga rruga e planifikuar.
Për disa ditë, shoferi dhe pasagjerët u përpoqën vazhdimisht të riparonin automjetin, por përpjekjet e tyre rezultuan të pasuksesshme.
“Të privuar nga uji dhe të paaftë për të riparuar mjetin, pavarësisht përpjekjeve të shoferit, ndihmësit të tij dhe pasagjerëve, udhëtarët mbetën të bllokuar në zemër të një mjedisi armiqësor”, thuhet më tej në deklaratë.
“Dhjetëra trupa të pajetë u gjetën nën kamionin e palëvizshëm dhe në zonën përreth tij”, përfundon deklarata e autoriteteve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
