Ivanka Trump, vajza e Presidentit të SHBA-së Donald Trump, thuhet se u vu në shënjestër të një terroristi të trajnuar nga Trupat e Gardës Revolucionare Islamike (IRGC), me qëllim hakmarrjen për vrasjen e Gjeneralit Qasem Soleimani, i cili u vra nga Shtetet e Bashkuara në një operacion në Bagdad në janar 2020.
New York Post raportoi se 32-vjeçari irakian Mohammad Baqer Saad Dawood Al-Saadi “u betua” se do ta vriste Ivankën dhe arriti të merrte një plan të katit të rezidencës së saj në Florida.
Sipas burimeve të cituara nga gazeta, Al-Saadi tha se “Vrasja e Ivankës do të thoshte djegia e shtëpisë së Trump ashtu siç dogji tonën”.
I dyshuari postoi në rrjetet sociale një hartë të zonës së banimit ku jeton Ivanka me bashkëshortin e saj Jared Kushner, të shoqëruar me kërcënime në arabisht kundër familjes Trump dhe shërbimeve sekrete amerikane.
Al-Saadi, i cili besohet të jetë i afërt me milicitë shiite Kata’ib Hezbollah dhe Pasdaran, u arrestua në Turqi më 15 maj dhe u ekstradua në Shtetet e Bashkuara.
Departamenti Amerikan i Drejtësisë, e akuzon atë për koordinimin ose planifikimin e të paktën 18 sulmeve dhe përpjekjeve për sulme në Evropë dhe Amerikën e Veriut kundër objektivave amerikane dhe hebraike.
Ndër incidentet e diskutueshme, New York Post përmend hedhjen e koktejeve Molotov në Bank of New York Mellon në Amsterdam, goditjen me thikë të dy qytetarëve hebrenj në Londër dhe një të shtënë në Konsullatën e SHBA-së në Toronto. Autoritetet federale e lidhin atë gjithashtu me sulme zjarrvënëse kundër vendeve të kultit hebraik në Belgjikë dhe Holandë.
Sipas Entifadh Qanbar, një ish-atashe ushtarak në ambasadën irakiane në Uashington, al-Saadi u rrit në Bagdad dhe më vonë u trajnua në Iran nga Garda Revolucionare pas vdekjes së babait të tij, gjeneralit iranian Ahmad Kazemi.
Qanbar pretendon se terroristi i dyshuar përdori një agjenci të dyshuar udhëtimesh fetare për të udhëtuar jashtë vendit dhe për të krijuar lidhje me qelizat ekstremiste.
Al-Saadi ishte shumë aktiv në mediat sociale, duke postuar imazhe të simboleve ushtarake iraniane dhe mesazhe mbështetjeje për Soleimanin. Ai aktualisht po mbahet në izolim në Qendrën e Paraburgimit Metropolitan në Brooklyn.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
