“Do të paguajnë çmim të rëndë”, Izraeli paralajmëron goditje më të forta ndaj Iranit

Izraeli ka paralajmëruar përshkallëzim të mëtejshëm të sulmeve ndaj Iranit, në përgjigje të sulmeve të vazhdueshme me raketa. 

Ministri i Mbrojtjes i Izraelit, Israel Katz, deklaroi se operacionet ushtarake do të “intensifikohen dhe zgjerohen” duke synuar sektorë të ndryshëm që, sipas tij, mbështesin kapacitetet ushtarake të Iranit.

Në një video të publikuar nga zyra e tij, Katz theksoi se Irani do të përballet me një “çmim të rëndë” për vazhdimin e sulmeve, të cilat ai i cilësoi si krime lufte kundër civilëve izraelitë.

Ndërkohë, situata humanitare në Iran po përkeqësohet. Sipas Federata Ndërkombëtare e Shoqatave të Kryqit të Kuq dhe Gjysmëhënës së Kuqe, mbi 1,900 persona janë vrarë dhe të paktën 20,000 të tjerë janë plagosur që nga fillimi i sulmeve të kombinuara amerikane dhe izraelite. 

Zëdhënësja Maria Martinez bëri të ditur se Gjysmëhëna e Kuqe Iraniane vazhdon të jetë organizata e vetme humanitare që operon në të gjithë vendin në kushtet e përshkallëzimit të konfliktit.

Në Izrael, kritikat ndaj qeverisë po rriten. Lideri i opozitës, Yair Lapid, paralajmëroi se lufta po i kalon kapacitetet e ushtrisë.

“Ushtria është e tendosur deri në limit. Qeveria po e çon vendin në një luftë shumëfrontëshe pa strategji dhe pa burimet e nevojshme”, deklaroi ai, duke iu referuar edhe shqetësimeve të ngritura nga shefi i ushtrisë, Eyal Zamir.