Një studim i ri mbi kancerin ka treguar rezultate premtuese për pacientët me tumore që nuk i përgjigjen më trajtimeve standarde, duke ngjallur shpresa për një alternativë të re terapeutike.
Mjekët kanë vlerësuar si të jashtëzakonshme rezultatet e një prove klinike, ku një injeksion i quajtur amivantamab arriti të zhdukë plotësisht tumoret te disa pacientë dhe të zvogëlojë ndjeshëm madhësinë e tyre te shumë të tjerë.
Sipas të dhënave të publikuara nga Instituti i Kërkimeve të Kancerit (ICR) në Londër, tumoret u tkurrën te 42 për qind e pacientëve të përfshirë në studim. Trajtimi u testua te persona me kancer të kokës dhe qafës të përsëritur ose metastatik, të cilët kishin ndaluar së reaguari ndaj kimioterapisë dhe imunoterapisë.
Amivantamabi është një antitrup monoklonal bispecifik që vepron duke bllokuar dy mekanizma kyç të rritjes së tumorit – receptorin e faktorit të rritjes epidermale (EGFR) dhe rrugën MET – ndërsa njëkohësisht ndihmon sistemin imunitar të sulmojë qelizat kancerogjene.
Profesori Kevin Harrington, onkolog konsulent dhe profesor i terapive biologjike të kancerit në ICR, tha se rezultatet janë të paprecedenta për këtë kategori pacientësh.
“Këto janë përgjigje të forta të papara te pacientët, sëmundja e të cilëve është bërë rezistente si ndaj kimioterapisë ashtu edhe ndaj imunoterapisë. Ky është një grup pacientësh me mundësi shumë të kufizuara trajtimi, ndaj ky nivel përfitimi është vërtet i jashtëzakonshëm”, u shpreh ai.
Studimi, pjesë e provës klinike OrigAMI-4, përfshiu 102 pacientë me karcinomë skuamoze të kokës dhe qafës të përsëritur ose metastatike. Të gjithë pjesëmarrësit morën vetëm amivantamab.
Rezultatet treguan se tumoret u zvogëluan te 43 pacientë. Në 15 raste ato u zhdukën plotësisht, ndërsa te 28 të tjerë u tkurrën ndjeshëm.
Pacientët e trajtuar me amivantamab jetuan mesatarisht 12.5 muaj pas fillimit të trajtimit, ndërsa tumoret filluan të përgjigjeshin brenda rreth gjashtë javësh. Mesatarisht, kaluan më shumë se gjashtë muaj e gjysmë përpara se sëmundja të fillonte të përparonte sërish.
Një nga pjesëmarrësit në studim, Carl Walsh, 56 vjeç nga Birminghami, i diagnostikuar me kancer të gjuhës në vitin 2024, raportoi përmirësim të ndjeshëm pas trajtimit.
“Tani ndihem i aftë të jetoj një jetë normale. Para se të filloja provën, kisha vështirësi në të folur dhe në të ngrënë për shkak të ënjtjes dhe dhimbjes. Që nga fillimi i trajtimit, ënjtja është zvogëluar ndjeshëm dhe dhimbjet janë lehtësuar shumë”, tha ai.
Një tjetër avantazh i amivantamabit është mënyra e administrimit. Ndryshe nga shumë terapi të tjera kundër kancerit që kërkojnë infuzione intravenoze, ky ilaç jepet përmes një injeksioni çdo tre javë, duke e bërë trajtimin më të shpejtë dhe më të përshtatshëm për pacientët.
Sipas studiuesve, efektet anësore ishin kryesisht të lehta ose të moderuara, ndërsa më pak se 10 pacientë e ndërprenë trajtimin për shkak të tyre.
Profesori Kristian Helin, drejtor ekzekutiv i ICR, tha se rezultatet përfaqësojnë një hap të rëndësishëm përpara në trajtimin e kancerit.
“Arritja e këtij niveli të përgjigjes së tumorit dhe rezultatet inkurajuese të mbijetesës në një grup kaq të vështirë për t’u trajtuar përfaqësojnë një përparim të rëndësishëm”, tha ai.
Amivantamabi është miratuar tashmë për disa nëntipe të kancerit të mushkërive, ndërsa studiuesit besojnë se rezultatet e reja mund të hapin rrugën për përdorimin e tij edhe në forma të tjera të kancerit.
Studimi do të prezantohet në takimin vjetor të Shoqatës Amerikane të Onkologjisë Klinike (ASCO).
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
