Komediani turk Deniz Goktas është arrestuar me vendim të një gjykate në Stamboll, pasi u ndalua në aeroportin kryesor të qytetit për shkak të një shfaqjeje stand-up që ka grumbulluar rreth 9.4 milionë shikime në YouTube.
Ai akuzohet për “nxitje të urrejtjes dhe armiqësisë”, si edhe për fyerje të presidentit turk Rexhep Tajip Erdogan, lidhur me pjesë të performancës së tij ku përmenden Erdogani dhe Kurani.
Arrestimi i Goktas konsiderohet nga kritikët si pjesë e një vale më të gjerë masash kundër zërave kritikë në Turqi. Kohët e fundit, autoritetet kanë kufizuar qasjen në llogaritë e mediave sociale të disa organizatave dhe aktivistëve LGBT+, ndërsa mbi 200 persona janë ndaluar para samitit të NATO-s që do të mbahet më 7-8 korrik në Ankara.
Për këtë samit janë angazhuar dhjetëra mijëra efektivë sigurie. Në takim pritet të marrin pjesë presidenti amerikan Donald Trump, liderë evropianë dhe presidenti ukrainas Volodymyr Zelensky.
Gjatë muajit të kaluar janë arrestuar gjithashtu gazetarë, avokatë, akademikë, sindikalistë, aktivistë mjedisorë dhe përfaqësues të komunitetit LGBT. Autoritetet kanë ndaluar protestat në Ankara deri më 10 korrik, ndërsa mediat e pavarura kanë deklaruar se u është refuzuar akreditimi për të raportuar nga samiti.
Mes të ndaluarve ishin edhe disa vullnetarë të Fondacionit Tema, një prej organizatave më të njohura mjedisore në vend. Sipas fondacionit, shumica e tyre ishin pensionistë që po ktheheshin nga një aktivitet në natyrë dhe më pas u liruan.
Deniz Goktas u arrestua sapo u kthye nga pushimet. Pamjet ku ai shfaqet me duart e prangosura pas shpine shkaktuan reagime dhe kritika të shumta nga mbështetësit e tij.
Pas marrjes në pyetje nga prokurorët në Gjykatën e Çaglayanit në Stamboll, gjykata vendosi paraburgimin e tij. Zyra e Kryeprokurorit të Stambollit bëri të ditur se kishte marrë 185 ankesa lidhur me videon e komedianit.
Edhe Drejtoria e Çështjeve Fetare të Turqisë reagoi ndaj shfaqjes, duke deklaruar në predikimin javor se tallja me vlerat fetare në platformat digjitale, nën petkun e humorit, po ndikon negativisht te brezat e rinj.
Në dëshminë e tij, Goktas mohoi se kishte synim të fyente besimtarët apo presidentin. Ai theksoi se e kishte interpretuar të njëjtën shfaqje në qytete të ndryshme të Turqisë për afro tre vjet dhe se përdorimi i termit “diktator” është pjesë e debatit publik në vend.
Komediani shtoi se mbi 100 mijë persona e kishin ndjekur shfaqjen live pa paraqitur ankesa dhe se videoja ishte regjistruar më 1 qershor në një skenë të njohur në Stamboll, përpara se të publikohej në YouTube më 24 qershor.
Organizata Human Rights Watch e ka lidhur këtë rast me përkeqësimin e lirisë së shprehjes në Turqi, duke paralajmëruar për kufizime ndaj opozitës, mediave dhe kritikëve të qeverisë.
Ndërkohë, rivali kryesor politik i Erdoganit, kryebashkiaku i Stambollit Ekrem Imamoglu, vazhdon të jetë në burg dhe përballet me disa akuza, përfshirë korrupsionin.
Edhe Partia Republikane Popullore (CHP) është përballur me presion. Në muajin maj, një gjykatë në Ankara shkarkoi drejtuesit e saj, përfshirë kryetarin Ozgur Ozel, duke rikthyer në krye figurën veterane Kemal Kiliçdaroglu. Opozita e ka cilësuar këtë veprim si një përpjekje për të dobësuar demokracinë dhe për të neutralizuar partinë.
Të premten, dhjetëra qytetarë u mblodhën pranë Gjykatës së Çaglayanit në shenjë mbështetjeje për Goktas. Gjatë mbërritjes së Kiliçdaroglu u dëgjuan edhe thirrje kundërshtuese, ndërsa ai kërkoi lirimin e menjëhershëm të komedianit dhe kritikoi mënyrën e arrestimit të tij në aeroport.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
