Organizata Botërore e Shëndetësisë ka shprehur shqetësim të thellë për përhapjen e shpejtë të virusit Ebola në Republika Demokratike e Kongos dhe Uganda, ndërsa Sudani i Jugut është vendosur në gjendje gatishmërie të lartë për shkak të rrezikut të përhapjes së sëmundjes.
Drejtori i Përgjithshëm i OBSH-së, Tedros Adhanom Ghebreyesus, deklaroi sot se numri i rasteve të dyshuara të variantit Bundibugyo të Ebolës ka kaluar 500, ndërsa mbi 130 persona dyshohet se kanë humbur jetën.
Sipas OBSH-së, shpërthimi po përhapet me shpejtësi të madhe në provincën Ituri të Kongos Lindore, ku janë konfirmuar dhjetëra raste.
Virusi tashmë ka arritur edhe në zona urbane si Goma dhe Kampala, duke rritur frikën për një përhapje rajonale më të gjerë.
“Këto shifra do të ndryshojnë ndërsa operacionet në terren po shtohen, përfshirë forcimin e mbikëqyrjes, gjurmimin e kontakteve dhe testimet laboratorike”, u tha Ghebreyesus anëtarëve të asamblesë Botërore të Shëndetësisë, të cilët po takohen këtë javë në Gjenevë.
Ekspertët shëndetësorë paralajmërojnë se situata është veçanërisht shqetësuese sepse lloji Bundibugyo i Ebolës nuk ka ende vaksinë apo trajtim specifik të miratuar. Konfliktet e vazhdueshme në lindje të Kongos, lëvizjet e mëdha të popullsisë dhe sulmet ndaj personelit mjekësor po e bëjnë shumë të vështirë kontrollin e epidemisë.
OBSH ka bërë të ditur se po mobilizon fonde emergjente dhe ekipe specialistësh për të ndihmuar autoritetet lokale në gjurmimin e kontakteve, testimin laboratorik dhe izolimin e rasteve të dyshuara. Organizata ka paralajmëruar gjithashtu se numri real i rasteve mund të jetë më i lartë sesa raportimet aktuale.
Ndërkohë, autoritetet në Sudanin e Jugut dhe vendet fqinje kanë shtuar kontrollet kufitare dhe masat parandaluese për të shmangur përhapjen e virusit përtej rajonit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
