Google ka vendosur të tërheqë përkohësisht një funksion të ri të inteligjencës artificiale në Google Earth, vetëm një ditë pas prezantimit të tij, pasi përdoruesit shpërndanë imazhe të krijuara nga AI që dyshohet se shkelnin politikat e kompanisë.
Veçoria, e bazuar në modelin e inteligjencës artificiale Nano Banana 2, u mundësonte përdoruesve të krijonin pamje fotorealiste të vendeve të ndryshme në botë duke përdorur imazhe satelitore, ajrore dhe modele 3D të Google Earth.
Përdoruesit mund të shkruanin një përshkrim tekstual dhe sistemi krijonte një skenë të re të bazuar në një vendndodhje reale. Megjithatë, mjeti u përball shpejt me kritika për mundësinë e krijimit të përmbajtjeve mashtruese, pasi lejonte gjenerimin e skenarëve të rremë mbi monumente, pika turistike dhe vende reale.
Google njoftoi në platformën X se kishte parë përdorime të dobishme të funksionit nga profesionistë të fushës gjeohapësinore, por gjithashtu kishte identifikuar raste ku imazhet e krijuara dukej se nuk përputheshin me rregullat e sigurisë së kompanisë.
“Kemi parë profesionistë gjeohapësinorë që e përdorin këtë veçori për një sërë qëllimesh të dobishme, megjithatë kemi parë edhe njerëz që ndajnë pamje të ekranit të imazheve të gjeneruara që duket se shkelin politikat tona”, deklaroi Google.
Kompania nuk bëri të ditur se cilat kategori imazhesh kishin shkaktuar shkelje, por sqaroi se këto krijime nuk shfaqeshin në versionin kryesor të Google Earth dhe ishin të shënuara me filigranë që tregonin se ishin prodhuar nga inteligjenca artificiale.
Vendimi i Google vjen në një periudhë kur kompanitë më të mëdha të teknologjisë po përballen me sfida të reja në integrimin e inteligjencës artificiale në produktet e tyre.
Probleme të ngjashme kanë çuar edhe kompani të tjera të kufizojnë ose të pezullojnë përkohësisht funksione të reja për shkak të shqetësimeve mbi privatësinë, dezinformimin dhe përdorimin e papërshtatshëm.
Më herët, edhe Meta pezulloi një veçori të inteligjencës artificiale që përdorte imazhe nga llogaritë publike në Instagram, pas kritikave lidhur me privatësinë dhe përdorimin e të dhënave të përdoruesve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
