“Bashkoni Mbretërinë” / Tubimi i ekstremit të djathtë, plagosen 26 oficerë policie në Londër

Më shumë se 110,000 dolën në rrugët e Londrës në një protestë të ekstremit të djathtë organizuar nga aktivisti Stephen Yaxley-Lennon, i njohur si Tomy Robinson, e konsideruar nga mediat si ngjarja më e madhe nacionaliste në dekada.

Qytetarë nga e gjithë Britania udhëtuan për në Londër  me tren dhe autobus për të qenë pjesë e një demonstrate, e cila u cilësua si  “festival i lirisë së fjalës”, por që në përfundim kishte amplifikuar teoritë raciste të konspiracionit dhe gjuhën e urrejtjes anti-myslimane.

Demonstratat vijnë mes rritjes së ndjenjës anti-imigracion, ndërsa Reform UK e mbështetësit të Brexit, Nigel Farage, kryeson në sondazhet e opinionit publik. 

Robinson, 42 vjeç, prej vitesh zbaton një axhendë anti-myslimane dhe kundër emigranteve. 

Policia Metropolitane tha se të paktën 25 persona u arrestuan dhe 26 oficerë u plagosën, katër prej të cilëve në gjendje të rëndë.  Protestuesit u arrestuan për veprat penale,  përleshje, çrregullime të dhunshme, sulme dhe dëme kriminale.

Turmave iu drejtua edhe Elon Musk, i cili bëri thirrje për "shpërbërjen e parlamentit" dhe një "ndryshim të qeverisë" në Mbretërinë e Bashkuar, ndërsa iu drejtua një turme në tubimin "Bashkoni Mbretërinë" në Londër, të organizuar nga aktivisti i ekstremit të djathtë Stephen Yaxley-Lennon, i njohur si Tommy Robinson.

Unë me të vërtetë mendoj se duhet të ketë një ndryshim të qeverisë në Britani. Nuk mundeni - nuk kemi katër vjet të tjera, ose kurdo që të jenë zgjedhjet e ardhshme, janë shumë të gjata. Diçka duhet të bëhet. Parlamenti duhet të shpërbëhet dhe duhet të mbahet një votim i ri. 

Musk  tha gjithashtu se "e majta është partia e vrasjes", duke iu referuar vdekjes së Charlie Kirk.

Ka kaq shumë dhunë në të majtën, miku ynë Charlie Kirk u vra me gjakftohtësi këtë javë, dhe njerëzit e festojnë hapur këtë. E majta është partia e vrasjes dhe feston vrasjen. Dua të them, lëreni këtë të ngulitet në mendjen tuaj për një moment, ne po merremi me ta.

Politikani francez i ekstremit të djathtë Éric Zemmour u ftua gjithashtu të fliste. Ai u tha protestuesve se ata ishin subjekt i “zëvendësimit të madh të popullit tonë evropian nga popuj që vijnë nga jugu dhe nga kultura myslimane”, duke shtuar se “ju dhe ne po kolonizohemi nga ish-kolonitë tona”.

Rreth 5,000 kundërprotestues nga sindikatat dhe grupet antifashiste marshuan në një rrugë të veçantë në Londrën qendrore.