Një grup hakerash që pretendohet se ka lidhje me Iranin ka deklaruar se ka arritur të depërtojë në telefonin personal të ish-Shefit të Shtabit të Ushtrisë izraelite, Herzi Halevi, duke marrë një sasi të konsiderueshme materialesh të ndjeshme.
Sipas pretendimeve të bëra publike, bëhet fjalë për mbi 19.000 skedarë, përfshirë fotografi dhe video që lidhen me takime të nivelit të lartë dhe operacione strategjike.
Grupi i njohur si Handala Hack Team publikoi një deklaratë në faqen e tij zyrtare, ku theksoi se operacioni kishte zgjatur më shumë se një vit.
Ata pretendojnë se gjatë kësaj periudhe kanë arritur të monitorojnë dhe mbledhin informacione nga burime shumë të ndjeshme, përfshirë ambiente që zakonisht konsiderohen të sigurta si dhomat e krizave dhe qendrat e komandës ushtarake.
Në deklaratën e tyre, hakerat përdorën një ton sfidues, duke pretenduar se infrastruktura sekrete e Izraelit ka qenë “si një libër i hapur” për ta.
Ata shtuan se materialet e siguruara përfshijnë jo vetëm pamje vizuale, por edhe detaje të hollësishme mbi organizimin e operacioneve dhe vendndodhjet strategjike.
Megjithatë, deri më tani nuk ka një konfirmim zyrtar nga autoritetet izraelite mbi vërtetësinë e këtyre pretendimeve. Ekspertët e sigurisë kibernetike theksojnë se raste të tilla shpesh shoqërohen me luftë informacioni dhe propagandë, sidomos në kontekstin e tensioneve të vazhdueshme mes Izrael dhe Iran.
“Të gjitha objektet tuaja sekrete, dhomat e krizave, hartat dhe madje edhe detajet më të vogla të qendrave tuaja të komandës kanë qenë prej kohësh si një libër i hapur për ne”, thuhet në deklaratën e grupit.
Nëse këto pretendime rezultojnë të sakta, incidenti mund të përbëjë një nga shkeljet më serioze të sigurisë në nivelet e larta ushtarake izraelite, duke ngritur shqetësime të mëdha mbi mbrojtjen e të dhënave dhe sigurinë e komunikimeve të zyrtarëve të lartë. Një rrjedhje e tillë informacioni mund të ketë pasoja të rëndësishme strategjike dhe të ndikojë në balancën e sigurisë në rajon.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
