Zjarret e mëdha në jug të Francës kanë zbuluar një depo me rreth 400 predha dhe municione të mbetura nga Lufta e Dytë Botërore në fshatin Le Porge.
Sipas autoriteteve, shpërthimet e dëgjuara gjatë zjarrit, që fillimisht u menduan si bombola gazi, rezultuan të ishin municione historike të aktivizuara nga temperaturat e larta.
Kryebashkiaku i Le Porge bëri të ditur se gjatë dy netëve të zjarrit u dëgjuan mbi 100 shpërthime, ndërsa disa predha fluturuan në drejtime të ndryshme, duke dëmtuar edhe banesa.
Deri më tani janë gjetur predha mortajash, municione antitank dhe armë të tjera të prodhimit gjerman dhe francez. Pas operacioneve të çminimit, shumica e banorëve janë rikthyer në shtëpitë e tyre, megjithëse disa zona mbeten të izoluara për arsye sigurie.
Zjarri shkatërroi mbi 180 banesa dhe dogji rreth 42 mijë hektarë në rajonin e Girondës, duke u konsideruar një nga zjarret më të mëdha në Francë që nga Lufta e Dytë Botërore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
