Autoritetet në qytetin japonez Utsunomiya kanë vendosur të mbyllin të gjitha 94 shkollat fillore dhe të mesme pasi një ari i zi aziatik u pa për herë të parë në territor.
Vendimi u mor për arsye sigurie, ndërsa forcat e policisë dhe grupet lokale të gjuetisë vazhdojnë kërkimet për kafshën.
Ariu, i cili mendohet të jetë rreth një metër i gjatë, u vu re fillimisht pranë një parku të shtunën.
Më pas, kamerat e sigurisë e filmuan duke lëvizur në qendër të qytetit gjatë natës, ndërsa gjatë ditëve në vijim ai u pa në disa zona të banuara dhe industriale.
Zyrtarët lokalë kanë këshilluar banorët të mbajnë të mbyllura dyert dhe dritaret, të shmangin çdo kontakt me kafshën dhe të kërkojnë strehim të menjëhershëm nëse e hasin atë.
Për të informuar qytetarët, në rrugë janë vendosur automjete me sisteme njoftimi publik.
Rastet e takimeve me arinj në Japoni kanë arritur nivele rekord këtë vit, me rreth 50.000 raportime në të gjithë vendin, kryesisht në rajonet verilindore.
Megjithatë, shfaqja e tyre pranë Tokios konsiderohet e pazakontë dhe ka ngritur shqetësime të reja për sigurinë publike.
Vetëm javën e kaluar, një ari në Fukushima plagosi disa persona dhe hyri në ndërtesa biznesi e fabrika, duke shkaktuar alarm në komunitetin lokal.
Sulmet dhe incidentet e lidhura me arinjtë janë shtuar ndjeshëm vitet e fundit, duke detyruar autoritetet të shqyrtojnë teknologji të reja, përfshirë sistemet e inteligjencës artificiale dhe kamerat e vëzhgimit për monitorimin e lëvizjeve të tyre.
Ekspertët besojnë se ndryshimet në disponueshmërinë e ushqimit natyror, si dhe zbrazja e zonave rurale nga popullsia e re, po i shtyjnë arinjtë të afrohen gjithnjë e më shumë me vendbanimet njerëzore në kërkim të ushqimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
