Pentagoni përdori një avion sekret të lyer për t’u dukur si një avion civil në sulmin e parë kundër një anijeje të dyshuar për drogë, duke vrarë 11 persona shtatorin e kaluar.
Avioni e mbante armatimin e tij brenda trupit të avionit, në vend që të ishte i dukshëm poshtë krahëve.
New York Times raporton një lajm të tillë, duke cituar zyrtarë të njohur me çështjen dhe duke ngritur mundësinë e një krimi lufte të njohur si “pabesi”.
Sipas ekspertëve ligjorë, aspekti jo-ushtarak është i rëndësishëm, pasi administrata amerikane ka argumentuar se sulmet vdekjeprurëse ndaj anijeve janë të ligjshme dhe jo vrasëse sepse Presidenti Donald Trump ka “vërtetuar” se Shtetet e Bashkuara janë të angazhuara në një konflikt të armatosur me kartelet e drogës.
Megjithatë, ligjet e konfliktit të armatosur i ndalojnë luftëtarët të pretendojnë statusin e civilit për të bindur një armik të ulë vigjilencën e tij dhe pastaj ta sulmojë dhe ta vrasë atë. Kjo, shkruan gazeta, përbën një krim lufte të njohur si “pabesi”.
Gjenerali Major në pension Steven J. Lepper, një ish-Zëvendës Gjyqtar Avokat i Përgjithshëm i Forcave Ajrore të SHBA-së, tha se nëse avioni ishte lyer për të maskuar natyrën e tij ushtarake dhe ishte afruar mjaftueshëm sa të shihej nga personat në bordin e anijes, duke i bërë ata të mos e kuptojnë nevojën për të ndërmarrë veprime shmangëse ose për t’u dorëzuar për të mbijetuar, kjo do të përbënte një krim lufte sipas standardeve të ligjit të konfliktit të armatosur.
Fshehja e identitetit të dikujt është një element i pabesisë. Nëse avioni që fluturon sipër kokës nuk është i identifikueshëm si një avion luftarak, ai nuk duhet të përfshihet në aktivitete luftarake.
Sipas zyrtarëve që panë ose u informuan mbi pamjet e kamerave të sigurisë të sulmit, avioni zbriti mjaftueshëm ulët sa të ishte i dukshëm për ata që ndodheshin në bordin e anijes.
Me sa duket, anija ishte kthyer prapa drejt Venezuelës pasi e kishte parë avionin para sulmit të parë.
Dy të mbijetuar të sulmit fillestar u panë më vonë duke i përshëndetur avionit pasi u ngjitën në një pjesë të përmbysur të trupit, përpara se ushtria t’i vriste ata në një sulm pasues që fundosi edhe mbetjet e anijes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
