Një studim i ri nga Universiteti Loma Linda në Kaliforni ka zbuluar se konsumimi i rregullt i vezëve mund të lidhet me një rrezik më të ulët për zhvillimin e sëmundjes së Alzheimerit.
Hulumtimi, i publikuar në “Journal of Nutrition”, analizoi të dhënat e afro 40 mijë amerikanëve mbi moshën 65-vjeçare për një periudhë 15-vjeçare.
Sipas studiuesve, personat që konsumonin vezë pesë ose më shumë herë në javë kishin 27% më pak gjasa të diagnostikoheshin me Alzheimer krahasuar me ata që nuk konsumonin vezë. Ndërsa edhe ata që hanin vezë një herë në javë ose disa herë në muaj shfaqnin një rrezik 17% më të ulët.
Ekspertët theksojnë se vezët përmbajnë lëndë ushqyese të rëndësishme për shëndetin e trurit, si kolina, vitamina B12, luteina dhe omega-3. Sipas neurologut Dr. Joel Salinas, këto elemente ndihmojnë funksionin njohës dhe kujtesën gjatë plakjes.
Megjithatë, studiuesit paralajmërojnë se bëhet fjalë për një studim vëzhgues dhe jo provë përfundimtare se vezët parandalojnë Alzheimerin.
Ata theksojnë se rezultatet duhet të interpretohen me kujdes dhe se shëndeti i trurit ndikohet nga një kombinim faktorësh si dieta e balancuar, aktiviteti fizik dhe stili i jetesës.
Nutricionistët rekomandojnë që vezët të konsumohen si pjesë e një diete të shëndetshme, të shoqëruara me perime, drithëra të plota dhe ushqime të pasura me vlera ushqyese.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
