Kryeministri i Mbretërisë së Bashkuar, Keir Starmer, dhe Presidenti i SHBA-së, Donald Trump, ranë dakord se rihapja e Ngushticës së Hormuzit është “thelbësore për rifillimin e transportit global detar”, gjatë një telefonate të zhvilluar vonë të dielën, njofton BBC.
Telefonata, e cila u zhvillua në të njëjtën ditë kur Trump ndau një klip satirik për kryeministrin, zgjati rreth 20 minuta dhe u cilësua si “konstruktive”.
Kryeministri pritet të drejtojë më vonë një takim të emergjencës “Cobra” me kancelaren Rachel Reeves, guvernatorin e Bankës së Anglisë Andrew Bailey dhe zyrtarë të tjerë, për të diskutuar ndikimin ekonomik të konfliktit.
Të shtunën në mbrëmje, Trump i dha Iranit një afat prej 48 orësh për të rihapur Ngushticën e Hormuzit. Në të kundërt, ai paralajmëroi se SHBA do të “shkatërrojë” termocentralet iraniane, “duke filluar me më të madhin”.
Ndërkohë, Forcat e Mbrojtjes së Izraelit (IDF) kanë deklaruar se presin “disa javë të tjera luftime” kundër Iranit dhe Hezbollahut.
IDF njoftoi gjithashtu miratimin e planeve për të zgjeruar sulmet ndaj Hezbollahut në Liban, duke rritur frikën për një pushtim tokësor në shkallë të gjerë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
