Bashkimi Europian ka miratuar përfundimisht marrëveshjen tregtare me Shtetet e Bashkuara të Amerikës, duke i hapur rrugën hyrjes së saj në fuqi përpara afatit të 4 korrikut të vendosur nga presidenti amerikan, Donald Trump.
27 vendet anëtare të BE-së dhanë të enjten miratimin formal për marrëveshjen e negociuar vitin e kaluar me Uashingtonin.
Edhe Parlamenti Europian kishte dhënë më herët dritën jeshile për paktin, duke siguruar disa mekanizma mbrojtës për interesat europiane. Në kuadër të marrëveshjes, shtetet anëtare miratuan heqjen e tarifave doganore të BE-së për shumicën e produkteve industriale dhe bujqësore që importohen nga SHBA.
Ky ishte angazhimi kryesor i marrë nga europianët gjatë takimit të zhvilluar verën e kaluar në Turnberry të Skocisë, në këmbim të kufizimit në 15% të tarifave që administrata Trump vendosi ndaj importeve europiane.
Duke e konsideruar procesin e ratifikimit të BE-së shumë të ngadaltë, Donald Trump kishte vendosur afatin e 4 korrikut, ditën kur SHBA feston 250-vjetorin e saj, për finalizimin e marrëveshjes. Si pjesë e kompromisit të arritur në muajin maj, eurodeputetët siguruan përfshirjen e një klauzole skadimi, e cila parashikon që marrëveshja të përfundojë automatikisht në fund të vitit 2029, pas mbarimit të mandatit të Trump, nëse nuk votohet një zgjatje e saj.
Gjithashtu, Komisioni Europian do të ketë të drejtën të pezullojë marrëveshjen nëse deri në fund të vitit presidenti amerikan nuk heq tarifat shtesë prej 50% mbi qindra produkte që përmbajnë çelik dhe alumin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
