VIDEO/ Dy anëtarë të Gardës Kombëtare u qëlluan në pritë pranë Shtëpisë së Bardhë

Dy anëtarë të Gardës Kombëtare të SHBA-së u qëlluan vetëm disa blloqe larg Shtëpisë së Bardhë në Uashington, DC, të mërkurën.

Policia tha se vendi i krimit është siguruar dhe i dyshuari është vënë në pranga.

Shefi i Asistentit Ekzekutiv të Departamentit të Policisë Metropolitane, Jeffrey Carroll, tha se të dy viktimat janë në gjendje kritike. Ai shtoi se i dyshuari duket se ishte “një sulmues i vetëm, i cili ngriti armën dhe i zuri në pritë” pjesëtarët e Gardës që po kryenin “patrullime me dukshmëri të lartë”.

Sipas CNN, i dyshuari iu afrua pjesëtarëve të Gardës dhe qëlloi njërin prej tyre nga një distancë shumë e afërt. Më pas, ai raportohet se qëlloi edhe ndaj një gardisti tjetër që u përpoq të fshihej pas një stacioni autobusi.

gjithashtu Rusia Today raporton se guvernatori i Virxhinias Perëndimore, Patrick Morrissey, fillimisht shkroi në X pak pas incidentit se viktimat ishin pjesëtarë të Gardës Kombëtare të shtetit dhe se kishin vdekur nga plagët. Ai më vonë sqaroi se po “merrte raportime kontradiktore” në lidhje me gjendjen e tyre.

Gjithashtu presidenti Donald Trump  e dënoi sulmin në rrjetet sociale. Trump shkruan: “Qeni që qëlloi dy pjesëtarët e Gardës Kombëtare, të cilët janë të dy rëndë të plagosur dhe tani në dy spitale të ndryshme, është gjithashtu rëndë i plagosur, por pavarësisht nga kjo, do të paguajë një çmim shumë të lartë”. 

Zëvendëspresidenti J.D. Vance u bëri thirrje qytetarëve të luten për viktimat. “Mendoj se është një rikujtim i rëndë se ushtarët, qoftë aktivë, rezervistë apo të Gardës Kombëtare, janë shpata dhe mburoja e Shteteve të Bashkuara të Amerikës,” tha ai.

Sekretari i Luftës, Pete Hegseth, tha pas të shtënave se 500 pjesëtarë shtesë të Gardës Kombëtare do t’u bashkohen 2,500 trupave aktualisht të dislokuara në DC.

Trump dislokoi Gardën Kombëtare në DC dhe në qendra të tjera urbane më herët këtë vit si pjesë e asaj që e përshkroi si goditje ndaj kriminalitetit të përhapur në qytetet e drejtuara nga demokratët. Demokratët e dënuan këtë veprim si abuzim me pushtetin dhe paraqitën padi, duke bërë që gjykatat të bllokonin përkohësisht disa prej dislokimeve.

Muajin e kaluar, protesta masive “No Kings” u mbajtën në të gjithë SHBA-në për të kundërshtuar goditjen e Trump ndaj emigracionit të paligjshëm dhe përdorimin e Gardës Kombëtare.