Një gjykatë në Kinën lindore ka dënuar me vdekje një ish-zyrtar bashkiak për marrje ryshfeti me vlerë më shumë se 2.2 miliardë juanë, rreth 325 milionë dollarë, gjatë 30 viteve.
Yang Yulin, i cili mbajti pozicione të ndryshme në qytetin e Nanjingut nga viti 1993 deri në vitin 2023, u dënua edhe për shkelje të besimit, abuzim me pushtetin dhe pastrim parash.
69-vjeçari shfrytëzoi pozicionet e tij për të dhënë drejtpërdrejt projekte, transferime tokash dhe financim, në këmbim të parave dhe sendeve me vlerë, sipas mediave shtetërore.
Yang u vu nën hetim si pjesë e fushatës antikorrupsion të Presidentit Xi Jinping, e cila është shtrirë në qarqet ushtarake dhe nivelet më të larta të sektorit bankar, ndër të tjera.
Vendimi i gjykatës iu referua veprave penale të një “natyre jashtëzakonisht serioze” dhe që shkaktojnë dëme jashtëzakonisht të rënda për shtetin dhe popullin.
Që kur mori pushtetin, Presidenti Xi ka nisur valë fushatash kundër korrupsionit, të cilat kritikët thonë se janë përdorur edhe si mjet për të spastruar kundërshtarët politikë.
Megjithatë, dënimet me vdekje për krime financiare konsiderohen të rralla në Kinë, megjithëse ato shqiptohen herë pas here, veçanërisht kur rastet përfshijnë shuma të mëdha që tejkalojnë 1 miliard juanë.
Në vitin 2021, ish-drejtori financiar Lai Xiaomin u ekzekutua për pranimin e ryshfeteve me vlerë 1.8 miliardë juanë gjatë një periudhe 10-vjeçare.
Li Jianping, një ish-zyrtar i Mongolisë së Brendshme, u ekzekutua në vitin 2024 për përvetësim të fondeve publike dhe ryshfet në një total prej më shumë se 3 miliardë juanësh.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
