Presidenti i SHBA-ve, Donald Trump, u ka kërkuar negociatorëve amerikanë “të mos nxitojnë drejt një marrëveshjeje” me Iranin.
Sipas mediave amerikane, marrëveshja që po diskutohet përfshin zgjatjen me 60 ditë të armëpushimit, rihapjen e Ngushticës së Hormuzit dhe vazhdimin e negociatave mbi programin bërthamor iranian.
Në një postim në rrjetet sociale, Trump deklaroi se bisedimet po zhvillohen në mënyrë “konstruktive”, por theksoi se “të dyja palët duhet të marrin kohën e nevojshme dhe ta bëjnë marrëveshjen siç duhet”.
Një ditë më parë, Trump kishte deklaruar se marrëveshja ishte “kryesisht e negociuar”, duke nxitur spekulime se një njoftim zyrtar mund të ishte i afërt.
Megjithatë, mediat iraniane raportojnë se ende ekzistojnë “një ose dy” pika mosmarrëveshjeje mes palëve. Edhe zyrtarët iranianë kanë sinjalizuar progres në negociata, por zëdhënësi i Ministrisë së Jashtme iraniane, Esmail Baghaei, tha se kjo nuk do të thotë se është arritur marrëveshje për çështjet kryesore.
Tensionet mes SHBA-së, Israel dhe Iranit u përshkallëzuan më 28 shkurt, kur Izraeli dhe SHBA-ja ndërmorën sulme të mëdha ajrore ndaj objektivave iraniane. Teherani u kundërpërgjigj me dronë dhe raketa ndaj Izraelit dhe objektivave amerikane në vendet e Gjirit.
Një armëpushim i arritur në prill, që synonte të lehtësonte negociatat, është respektuar kryesisht, megjithëse ka pasur shkëmbime sporadike zjarri.
Trump ritheksoi se Irani “nuk mund të zhvillojë armë bërthamore”, duke përsëritur qëndrimin e SHBA-së dhe aleatëve perëndimorë. Uashingtoni dhe partnerët e tij dyshojnë se Irani po kërkon të prodhojë armë bërthamore përmes pasurimit të uraniumit, ndërsa Teherani këmbëngul se programi i tij ka vetëm qëllime paqësore.
Presidenti amerikan shtoi gjithashtu se bllokada e porteve iraniane nga SHBA-ja, e vendosur që nga fillimi i prillit, do të mbetet në fuqi deri në arritjen dhe nënshkrimin zyrtar të një marrëveshjeje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
