Biden sulmon Trumpin: Është një humbës, administrata e tij është e zhytur në korrupsion

Ish-presidenti amerikan Joe Biden sulmoi ashpër pasardhësin e tij, Donald Trump, gjatë një fjalimi në një mbrëmje gala të organizuar nga Partia Demokratike në Maryland, duke e cilësuar atë "një humbës" dhe duke e akuzuar administratën e tij për korrupsion të paprecedentë.

Në fjalimin 10-minutësh, Biden kritikoi projektet e Trumpit në Uashington, përfshirë prishjen e një pjese të Shtëpisë së Bardhë për ndërtimin e një salle vallëzimi, planet për ngritjen e një harku triumfi dhe investimet në projekte që, sipas tij, kanë dështuar.

"Uau! Çfarë humbësi", deklaroi Biden, duke iu referuar edhe vendimit të administratës Trump për të kompensuar personat e dënuar dhe më pas të falur për rolin e tyre në sulmin ndaj Kapitolit më 6 janar 2021.

Ish-presidenti demokrat e akuzoi gjithashtu Trumpin për korrupsion, duke pretenduar se kontrata publike janë dhënë në favor të donatorëve të presidentit.

"Është korrupsion i hapur dhe i paturp. Korrupsion në një shkallë të paparë në historinë e administratave amerikane", u shpreh Biden.

Në politikën e jashtme, ai kritikoi marrëdhëniet e Trumpit me presidentin rus Vladimir Putin dhe e akuzoi për dëmtimin e aleancës së NATO-s, duke thënë se ai "e ka dobësuar pozitën e Shteteve të Bashkuara në botë më shumë se çdo president tjetër në histori".

Fjalimi u mbajt pikërisht dy vjet pas debatit televiziv me Trumpin që çoi në tërheqjen e Bidenit nga gara presidenciale e vitit 2024. Pas kësaj, Trump fitoi mandatin e dytë në Shtëpinë e Bardhë, duke mposhtur kandidaten demokrate Kamala Harris.

Dalja publike e Bidenit vjen në një kohë kur ai dhe familja e tij janë rikthyer më aktivë në jetën publike. Ish-zonja e parë Jill Biden ka publikuar së fundmi kujtimet e saj, ndërsa djali i tyre, Hunter Biden, është bërë më aktiv në rrjetet sociale, ku flet për politikën, shëndetin mendor dhe betejën e tij me varësinë.