Dhjetëra persona, mes tyre edhe fëmijë, kanë humbur jetën në Afganistan pas sulmeve ajrore të ndërmarra nga Pakistani gjatë natës. Sipas autoriteteve afgane, rreth 70 persona janë vrarë dhe shumë të tjerë janë plagosur.
Pakistani deklaroi se sulmet kishin në shënjestër shtatë kampe dhe strehime të militantëve në lindje të Afganistanit, duke i cilësuar ato si “sulme selektive të bazuara në inteligjencë”.
Islamabadi tha se objektiv ishin anëtarë të Tehreek-i-Taliban Pakistan (TTP), të quajtur nga qeveria “Fitna al Khaëarij”, si dhe bashkëpunëtorë të tyre dhe degës rajonale të Shteti Islamik - Provinca Khorasan.
Sipas Pakistanit, sulmet ishin një përgjigje ndëshkuese ndaj shpërthimeve vetëvrasëse të fundit në territorin pakistanez, përfshirë një sulm në një xhami shiite në Islamabad dhe të tjera në provincën Khyber Pakhtunkhëa gjatë muajit të Ramazanit.
Ministria e Mbrojtjes e Afganistanit i dënoi ashpër bombardimet, duke i quajtur shkelje të integritetit territorial dhe të ligjit ndërkombëtar.
Sipas zyrtarëve lokalë në provincat Nangarhar dhe Paktika, sulmet goditën edhe zona civile.
Në Nangarhar, raportohet se një shtëpi u shkatërrua, duke vrarë rreth 20 anëtarë të një familjeje, përfshirë gra dhe fëmijë.
Tensionet mes dy vendeve janë rritur që prej vitit 2021, kur talebanët rimorën pushtetin në Afganistan. Pakistani akuzon autoritetet talebane se nuk kanë vepruar kundër grupeve militante që përdorin territorin afgan për të organizuar sulme në Pakistan, ndërsa Kabuli mohon këto pretendime.
Edhe pse ka pasur negociata dhe ndërmjetësime ndërkombëtare, përfshirë përpjekje nga Arabia Saudite për të ulur tensionet, situata mbetet e brishtë. Të dyja vendet ndajnë një kufi malor prej 2574 kilometrash, i cili ka qenë shpesh burim përplasjesh dhe incidentesh të armatosura.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
