Presidenti i SHBA-së, Donald Trump, ka njoftuar vendosjen e një raundi të ri tarifash ndaj disa vendeve evropiane që eksportojnë mallra në Shtetet e Bashkuara, duke nisur nga 1 shkurti.
Ai tha se këto masa do të mbeten në fuqi deri në “arritjen e një marrëveshjeje për blerjen e plotë dhe totale të Groenlandës” nga SHBA-ja, njofton BBC.
Në një postim në platformën Truth Social, Trump deklaroi se Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda do t’i nënshtrohen një tarife prej 10% për të gjitha mallrat e eksportuara drejt SHBA-së.
Sipas tij, nga 1 qershori tarifa do të rritet në 25%.
Presidenti amerikan argumentoi se SHBA-të kanë subvencionuar për vite me radhë Danimarkën dhe Bashkimin Evropian përmes mungesës së tarifave dhe shtoi se “është koha që Danimarka të kthejë mbrapsht”.
Ai paralajmëroi gjithashtu se “paqja botërore është në rrezik”, duke pretenduar se Kina synon Groenlandën dhe se Danimarka nuk është në gjendje ta mbrojë territorin.
Trump akuzoi disa vende evropiane se po “luajnë një lojë shumë të rrezikshme” në Groenlandë dhe theksoi se duhet të merren “masa të forta” për t’i dhënë fund asaj që e quajti një situatë potencialisht të rrezikshme.
Tarifat janë taksa mbi mallrat e importuara dhe zakonisht paguhen nga kompanitë importuese, duke reflektuar më pas rritje çmimesh për konsumatorët.
Ndërkohë, Kryetari i Dhomës së Përfaqësuesve të SHBA-së, Mike Johnson, deklaroi për BBC se nuk parashikohet ndërhyrje ushtarake amerikane në Groenlandë.
Ai theksoi se kanalet diplomatike janë rruga e duhur dhe se emërimi i një të dërguari të posaçëm për Groenlandën tregon këtë qasje.
Reagime ka pasur edhe në Mbretërinë e Bashkuar. Udhëheqësja e opozitës, Kemi Badenoch, i cilësoi tarifat e reja të Trump si “një ide të tmerrshme”, duke paralajmëruar se ato do të rrisin kostot për bizneset dhe konsumatorët në të dyja anët e Atlantikut.
Ajo theksoi se sovraniteti i Groenlandës duhet të vendoset vetëm nga populli i Groenlandës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
