Një studim i publikuar në Journal of Royal Society Interface paralajmëron se virusi Chikungunya, një sëmundje tropikale shumë e dhimbshme, tashmë mund të transmetohet në pjesën më të madhe të Evropës për shkak të rritjes së temperaturave.
Sipas analizës së realizuar nga UK Centre for Ecology & Hydrology, temperatura minimale për përhapjen e virusit është 13–14°C, rreth 2.5°C më e ulët nga sa mendohej më parë, çka zgjeron ndjeshëm zonat dhe periudhat e rrezikut.
Sëmundja transmetohet nga mushkonja tigër aziatike (Aedes albopictus), e cila po përhapet drejt veriut të kontinentit.
Studimi tregon se infeksionet janë të mundshme për më shumë se gjashtë muaj në vit në vende si Spanja, Italia dhe Greqia, dhe për disa muaj edhe në Evropën Qendrore. Shkencëtarët paralajmërojnë se zgjerimi i mëtejshëm drejt veriut është “vetëm çështje kohe”.
Shpërthime me qindra raste janë regjistruar në Francë dhe Itali gjatë vitit 2025, ndërsa ekspertët theksojnë se ndryshimet klimatike dhe lëvizjet ndërkombëtare po rrisin rrezikun e transmetimit lokal.
Autoritetet shëndetësore rekomandojnë forcimin e mbikëqyrjes, kontrollin e zonave me ujë të ndenjur dhe masa personale mbrojtëse për të parandaluar pickimet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
