Një zjarr i fuqishëm në një klub nate shumë të frekuentuar në rajonin bregdetar të Goa-s, Indi, i ka marrë jetën 25 personave.
BBC raporton se shumica e viktimave dyshohet të jenë punonjës të klubit në zonën Arpora, në Goa-n e Veriut.
Sipas hetimeve paraprake, zjarri nisi për shkak të një bombole gazi që shpërtheu në kuzhinën e klubit, duke shkaktuar përhapjen e menjëhershme të flakëve rreth mesnatës së së shtunës.
Autoritetet konfirmuan mëngjesin e së dielës se numri i viktimave u rrit nga 23 në 25, ndërsa gjashtë persona të tjerë po trajtohen në spital dhe ndodhen në gjendje të qëndrueshme.
Dëshmitarët në vendngjarje përshkruan skena paniku në zonën e njohur për jetën e gjallë të natës, ndërsa Alok Kumar, Drejtori i Përgjithshëm i Policisë së Goa-s thotë se zjarri ishte përqendruar kryesisht në zonën e kuzhinës në katin përdhes.
Sipas tij, shumica e trupave u gjetën pranë kuzhinës, çka përforcon dyshimin se viktimat ishin kryesisht punonjës të lokalit.
Mësohet gjithashtu se mes viktimave kanë qenë edhe katër turistë, kombësia dhe mosha e të cilëve ende nuk është identifikuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
