Presidenti rus Vladimir Putin po përballet me vështirësi në rritje për të mbajtur avantazhin në luftën kundër Ukrainës, ndërsa presionet ushtarake, ekonomike dhe sociale ndaj Kremlinit po shtohen. Kështu deklaroi shefi i inteligjencës së jashtme të Estonisë, Kaupo Rosin, në një intervistë për CNN.
Sipas Rosin, në katër deri në pesë muajt e ardhshëm, Putini mund të mos jetë më në gjendje të negociojë nga një pozicion force, pasi situata në frontin ukrainas po mbetet e bllokuar dhe humbjet ruse po rriten. Ai tha se Moska po humb më shumë ushtarë sesa arrin të rekrutojë, ndërsa përparimet territoriale janë ngadalësuar ndjeshëm gjatë këtij viti.
Zyrtari estonez theksoi se lufta me dronë ka ndryshuar balancat në fushëbetejë, duke kufizuar mundësinë për ofensiva të mëdha nga të dyja palët. Ndërkohë, Ukraina ka shtuar sulmet ndaj infrastrukturës energjetike ruse, duke shkaktuar dëme të konsiderueshme ekonomike.
Rosin paralajmëroi se një mobilizim i ri masiv nga Rusia mund të krijojë tensione të forta të brendshme për Kremlinin, ndërsa ekonomia ruse po ndjen efektet e sanksioneve perëndimore dhe kostos së luftës.
Megjithatë, ai vlerësoi se Putini nuk pritet të tërhiqet lehtë dhe mund të vazhdojë presionin ndaj Ukrainës, me synimin për të dobësuar vendin dhe për të ndikuar politikisht në Kiev.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
