“Dyshohet se ka ndarë informacione të ndjeshme me Rusinë”/ Orban: Të hetohet përgjimi i kryer ndaj ministrit të Jashtëm hungarez

Kryeministri hungarez Viktor Orban denoncoi përgjimin e një anëtari të qeverisë pas një  raporti të Washington Post se Ministri i Jashtëm Peter Szijjarto u kishte dhënë informacione rusëve në lidhje me negociatat e Bashkimit Evropian. 

"Përgjimi i një anëtari të qeverisë është një sulm serioz kundër Hungarisë", tha ai në një postim në Facebook, duke shtuar se i kishte kërkuar Ministrit të Drejtësisë të hetonte.

Sipas gazetës Washington Post, duke cituar disa zyrtarë aktualë dhe ish-zyrtarë evropianë të sigurisë, Peter Szijjarto e telefononte rregullisht homologun e tij rus, Sergey Lavrov gjatë pushimeve në mbledhjet e Këshillit të BE-së  për t'i dhënë atij "përshkrime të drejtpërdrejta të asaj që u diskutua", si dhe zgjidhje të mundshme.