Presidenti i SHBA-së, Donald Trump, ka njoftuar se bisedimet e reja me Iranin do të nisin këtë të hënë, pasi vendosi të anulojë sulmet ushtarake të planifikuara ndaj Teheranit për t’i hapur rrugë diplomacisë.
Duke folur për gazetarët në bordin e Air Force One, Trump deklaroi se negociatat do të fillojnë pasditen e së hënës, ndërsa shtoi se vendimi për të mos ndërmarrë sulme erdhi pas kërkesave të aleatëve të SHBA-së në Lindjen e Mesme, të cilët besojnë se një marrëveshje është pranë.
Në një postim në Truth Social, presidenti amerikan tha se Irani dhe partnerët rajonalë i kishin kërkuar të përmbahej nga veprimet ushtarake, pasi sipas tij ishin arritur "perimetrat" e një marrëveshjeje. Trump u shpreh se pret një dakordësi si për çështjen e Ngushticës së Hormuzit, ashtu edhe për programin bërthamor iranian.
Megjithatë, Irani nuk ka konfirmuar deklaratat e presidentit amerikan. Agjencia iraniane Mehr i hodhi poshtë pretendimet se Teherani kishte kërkuar pezullimin e sulmeve, duke i cilësuar ato si "të pavërteta". Ndërkohë, ministri i Jashtëm iranian, Abbas Araghchi, deklaroi se negociatat e ndërmjetësuara nga Omani për çështjen e Ngushticës së Hormuzit po avancojnë drejt finalizimit.
Trump nuk bëri të ditur vendin ku do të zhvillohen bisedimet dhe as se kush do të marrë pjesë në to. Ai theksoi se SHBA-ja mbetet e gatshme të veprojë ushtarakisht në çdo moment, por shtoi se synimi i tij është arritja e një zgjidhjeje përmes negociatave.
Pas deklaratave të Trump, tregjet reaguan pozitivisht. Çmimet ndërkombëtare të naftës shënuan rënie, ndërsa investitorët vlerësuan mundësinë e uljes së tensioneve në rajon, veçanërisht në Ngushticën e Hormuzit, përmes së cilës kalon rreth 20% e tregtisë botërore të naftës dhe gazit natyror të lëngshëm.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
