Lufta e vazhdueshme ndaj Iranit pritet të ngadalësojë ndjeshëm rritjen ekonomike globale, duke e çuar atë në ritmin më të dobët që nga pandemia e Covid-19, ndërsa një përshkallëzim i mëtejshëm i konfliktit mund të sjellë pasoja edhe më të rënda për ekonominë botërore.
Në raportin e saj më të fundit të publikuar të enjten, Banka Botërore parashikon që ekonomia globale të rritet me 2.5% gjatë këtij viti, krahasuar me 2.9% në vitin 2025.
Institucioni financiar ndërkombëtar paralajmëron se një zgjerim i armiqësive ose ndërprerje më të gjata të zinxhirëve të furnizimit mund të nxisin rritje të mëtejshme të çmimeve të mallrave, të shtojnë presionet inflacioniste, të përkeqësojnë pasigurinë ushqimore dhe të rrisin rreziqet për stabilitetin financiar global.
Sipas raportit, nëse ndërprerjet e furnizimit me energji bëhen më të rënda se sa parashikohet dhe shoqërohen me tensione të konsiderueshme financiare, rritja ekonomike globale mund të bjerë deri në 1.3% gjatë vitit 2026.
Ndërkohë, çmimet e naftës, gazit natyror dhe plehrave kimike kanë shënuar rritje të ndjeshme, ndërsa trafiku detar përmes Ngushticës së Hormuzit – një nga rrugët më të rëndësishme energjetike në botë – mbetet pothuajse i paralizuar.
Raporti thekson se pasojat e konfliktit do të ndihen veçanërisht në ekonomitë në zhvillim. Rritja ekonomike në këto vende pritet të jetë më e dobët se ajo e vitit 2025, ndërsa të ardhurat për frymë në shumicën e vendeve në zhvillim, me përjashtim të Kinës dhe Indisë, nuk pritet të rikthehen në nivelet para pandemisë përpara vitit 2028.
Banka Botërore vlerëson se pasiguria gjeopolitike dhe tronditjet në tregjet e energjisë mbeten ndër kërcënimet kryesore për perspektivën ekonomike globale në vitet e ardhshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
