Tre persona, mes tyre një vajzë 19-vjeçare, humbën jetën nga mbytja gjatë festimeve masive për fitoren e Meksikës ndaj Ekuadorit në Kupën e Botës, të zhvilluara të martën në Meksiko City.
Sipas autoriteteve shëndetësore të kryeqytetit, viktimat janë një 19-vjeçare, një grua 48-vjeçare dhe një burrë 44-vjeçar. Ata u transportuan me urgjencë në spital pasi u gjetën pa ndjenja në zona të ndryshme përgjatë bulevardit Paseo de la Reforma, por pavarësisht përpjekjeve të ekipeve mjekësore dhe kryerjes së reanimimit (CPR), nuk arritën të mbijetonin.
Më shumë se një milion njerëz dolën në rrugët e Meksiko City për të festuar fitoren 2-0 ndaj Ekuadorit, sukses që i siguroi Meksikës kualifikimin në fazën me eliminim direkt të Kupës së Botës për herë të parë që nga viti 1986. Pjesa më e madhe e tifozëve u mblodhën pranë monumentit të Engjëllit të Pavarësisë, ku u zhvilluan festimet më të mëdha.
Kryetarja e Bashkisë së Meksiko Sitit, Clara Brugada, shprehu ngushëllimet për familjet e viktimave dhe premtoi mbështetje për ta. Në një reagim në rrjetet sociale, ajo u bëri thirrje qytetarëve që festimet të zhvillohen gjithmonë me përgjegjësi, kujdes dhe empati.
Para ndeshjes, Brugada kishte paralajmëruar tifozët të shmangnin zonën pranë monumentit të Engjëllit të Pavarësisë për shkak të numrit të madh të njerëzve të grumbulluar.
Fitorja ndaj Ekuadorit siguroi kalimin e Meksikës në raundin e 16-të të Kupës së Botës, ku mund të përballet me Anglinë nëse kjo e fundit mposht Republikën Demokratike të Kongos në ndeshjen e saj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
