Konfrontimi mes Shteteve të Bashkuara dhe Iranit ka hyrë në një fazë të re përshkallëzimi, pas një serie sulmesh ajrore të raportuara në ishullin Qeshm, Bandar Abbas dhe portin e Sirik në Ngushticën e Hormuzit.
Sipas mediave iraniane, në ishullin strategjik të Qeshm janë dëgjuar të paktën gjashtë shpërthime, ndërsa shtatë të tjera janë regjistruar në portin e Sirik, një zonë me rëndësi kyçe për kontrollin e ngushticës.
Komanda Qendrore e SHBA-së (CENTCOM) deklaroi se sulmet përbëjnë kundërpërgjigje ndaj veprimeve iraniane, duke pretenduar se tre anije tregtare që kalonin tranzit në Ngushticën e Hormuzit u goditën nga Irani. Uashingtoni i cilësoi këto sulme si agresion të pajustifikuar dhe shkelje të armëpushimit.
Nga ana tjetër, Garda Revolucionare Islamike (IRGC) pretendon se ka goditur 85 instalime strategjike ushtarake amerikane në Kuvajt dhe Bahrein, si pjesë e një operacioni të përbashkët me raketa dhe dronë. Në deklaratën e transmetuar nga televizioni shtetëror IRIB, IRGC-ja tha gjithashtu se ka rrëzuar një dron amerikan të tipit MQ-9.
Përshkallëzimi ndodh në një kohë kur negociatat mes Uashingtonit dhe Teheranit për një marrëveshje përfundimtare pas konfliktit të muajve të fundit vijojnë ende. Paralelisht, Departamenti i Thesarit i SHBA-së ka revokuar një përjashtim të përkohshëm nga sanksionet, i cili i lejonte Iranit të prodhonte, shiste dhe eksportonte naftë bruto deri më 21 gusht, duke shtuar presionin ekonomik ndaj Teheranit.
Ministria e Jashtme iraniane akuzoi Shtetet e Bashkuara për shkelje të përsëritura të memorandumit të mirëkuptimit të dakordësuar mes palëve dhe paralajmëroi se do të ndërmarrë masa vendimtare në mbrojtje të interesave dhe sigurisë kombëtare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
