Autoritetet shëndetësore italiane kanë aktivizuar protokollet e emergjencës pas identifikimit të një rasti të dyshuar me virusin Ebola në Cagliari, në ishullin e Sardenjës.
Sipas euronews, bëhet fjalë për një person të kthyer së fundmi nga Republika Demokratike e Kongos, i cili ka shfaqur simptoma që mund të lidhen me virusin. Pas sinjalizimit, në vendngjarje u angazhuan ekipet e urgjencës, policia, zjarrfikësit dhe policia lokale për të garantuar transportimin e sigurt të pacientit drejt spitalit.
Mjekët dhe infermierët, të pajisur me veshje speciale mbrojtëse, e transferuan pacientin në repartin e sëmundjeve infektive të Spitalit “Santissima Trinità” në Cagliari, ku ai ndodhet aktualisht në izolim.
Në një deklaratë zyrtare, Ministria italiane e Shëndetësisë konfirmoi se pacienti është simptomatik dhe do t’i nënshtrohet analizave specifike për të verifikuar nëse është i infektuar me virusin Ebola.
Mostrat biologjike do të analizohen në Institutin Kombëtar për Sëmundjet Infektive “Lazzaro Spallanzani” në Romë, një nga qendrat më të specializuara në Itali për trajtimin e sëmundjeve infektive.
Ministria bëri të ditur se po monitoron situatën në bashkëpunim me autoritetet lokale shëndetësore dhe ekspertët e institutit Spallanzani.
Megjithatë, autoritetet theksojnë se rreziku për përhapjen e Ebolës në Itali mbetet shumë i ulët dhe nuk ka arsye për alarm në popullatë.
Rezultatet e analizave laboratorike priten në orët në vijim, ndërsa autoritetet do të publikojnë informacione të mëtejshme sapo të përfundojë procesi i verifikimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
