Një gjykatë federale e apelit në Shtetet e Bashkuara ka vendosur të pezullojë përkohësisht dërgimin me postë të pilulës së abortit mifepristone, e përdorur në shumicën e ndërprerjeve vullnetare të shtatzënisë në vend.
Vendimi, i marrë të premten nga një trup gjykues me prirje konservatore, zbatohet në të gjithë territorin amerikan dhe pritet të kufizojë më tej aksesin e grave në abort, i cili tashmë është ngushtuar ndjeshëm pas vendimit historik të Gjykatës Supreme e SHBA në vitin 2022 për t’i dhënë fund garancisë federale të këtij të drejte.
Çështja është ngritur nga Louisiana, i cili ka një nga legjislacionet më të ashpra kundër abortit në SHBA.
Autoritetet e këtij shteti kundërshtojnë vendimin e vitit 2023 të FDA, që hoqi detyrimin për ta marrë mifepristonin vetëm fizikisht në klinikë, duke lejuar shpërndarjen e saj edhe me postë.
Sipas paditësve, ekzistojnë rreziqe të mundshme për shëndetin, edhe pse këto pretendime janë hedhur poshtë nga konsensusi shkencor.
Vendimi i fundit i gjykatës së apelit bie ndesh me një vendim të mëparshëm të një gjykate të shkallës së parë në muajin prill, e cila kishte pezulluar çështjen dhe i kishte dhënë FDA-së një afat gjashtëmujor për të paraqitur përfundimet e analizës së saj mbi sigurinë e këtij ilaçi.
Ndërkohë, administrata e presidentit Donald Trump ka ndërmarrë një rishqyrtim të sigurisë së mifepristonit.
Sekretari i Shëndetësisë, Robert F. Kennedy Jr., ka nisur këtë proces në vitin 2025, i cili ende nuk ka përfunduar. Prokurorja e përgjithshme e Louisianës, Liz Murrill, e përshëndeti vendimin në rrjetet sociale, duke e cilësuar atë si një “fitore për jetën”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
