“Verë përvëluese”, Evropa Perëndimore përballet me temperatura rekord deri në 38°C

Një valë e pazakontë të nxehti ka përfshirë Evropën Perëndimore, duke sjellë temperatura rekord për muajin maj dhe alarm në disa prej vendeve më të mëdha të kontinentit.

Portugalia, Spanja, Franca dhe Mbretëria e Bashkuar po përgatiten për ditë me temperatura që pritet të kalojnë 30 gradë Celsius, ndërsa në disa rajone të Spanjës termometri mund të arrijë deri në 38°C.

Sipas parashikimeve meteorologjike, temperaturat janë mbi 10 gradë më të larta se mesatarja sezonale, duke e kthyer fundin e majit në një periudhë me kushte tipike të korrikut dhe gushtit. Në Paris dhe Londër priten deri në 32°C, ndërsa jugperëndimi i Francës do të përballet me vapë deri në 35°C.

Shërbimi meteorologjik francez, Météo-France, paralajmëroi se shumë rajone mund të regjistrojnë temperaturat më të larta të shënuara ndonjëherë për muajin maj. 

Meteorologët e lidhin këtë fenomen me një “kupolë nxehtësie”, e krijuar nga masat e ajrit të nxehtë që vijnë nga Maroku dhe mbeten të bllokuara nga presioni i lartë atmosferik.

Autoritetet klimatike paralajmërojnë se ngjarje të tilla ekstreme po bëhen gjithnjë e më të shpeshta si pasojë e ndryshimeve klimatike, ndërsa Evropa mbetet kontinenti që po ngrohet më shpejt në botë.

Në Mbretërinë e Bashkuar janë lëshuar alarme për temperatura “të jashtëzakonshme”, ndërsa meteorologët nuk përjashtojnë mundësinë që të thyhet rekordi historik i majit, i vendosur që në vitin 1944.

Ndërkohë, në Spanjë, temperaturat ekstreme kanë sjellë edhe pasoja tragjike. Një vajzë dyvjeçare humbi jetën në rajonin e Galicisë pasi u la aksidentalisht për disa orë në makinën e babait të saj nën vapën përvëluese.

Meteorologët spanjollë paralajmërojnë se vala e të nxehtit do të vazhdojë edhe gjatë javës së ardhshme, me temperatura që në disa zona do të mbeten 5 deri në 10 gradë mbi normalen sezonale.